【專訪】ViuTV藝人李蔓瑩踩入KOL界開Live 同觀眾齋傾偈拒行性感

撰文:秦志鴻
出版:更新:

「網絡直播」一詞,相信對現今都市人而言並不陌生,但到底看直播的「意義」何在?一位會看遊戲直播的「觀眾」,看直播主的「意義」是為了學習更高的技巧,或直播主的趣味性遊戲方式;一位看唱歌直播的觀眾或者是聽「歌手」的演唱聽膩了,希望聽一些較貼地的歌聲。

最近ViuTV藝人李蔓瑩(Renee)除了身兼原有的節目主持和活動司儀的工作之外,亦投身於直播行列,在「Uplive」開設頻道當一位不定時「直播主」(此辭彙源自內地,即是開直播的人),她不會玩遊戲、沒有唱歌、沒有玩樂器、沒有教化妝、沒有教運動、沒有教下廚,但依然大受網民歡迎,原因何在?

從「直播世界」外圍觀看,一位成功的直播主主要分為三類,技能型、花瓶型、第三類是集兩者於一身。花瓶型,顧名思義,樣貌標緻、身材火辣性感是必需。(陳順禎攝)

以發放正能量為己任

問:在開live期間,你通常會做甚麼?

Renee:最主要係同大家傾偈,其實我嘅直播最想就係大家都開心。啲網民通常都係問我節目啲嘢係咪真,例如同杜汶澤一齊拍嗰個節目咁,會問我有關個廚房嘅嘢,好多奇怪問題,咁我都會一一解答。有啲人都會悄悄話同我講啲心事,例如學業上嘅問題,家庭上嘅問題,或者係男女朋友嘅問題咁,我都有問佢哋點解連心事都會同我講,佢哋覺得個感覺真係好似朋友咁,又或者佢哋本身嘅朋友真係唔多,就係想我去畀啲意見佢,帶一啲正能量畀佢哋,我係可愛同開心樂天派!

Renee有一個外號,叫「人肉收音機」,原因是她太喜歡說話:「由瞓醒到瞓著嗰一刻我都係講緊嘢。」(陳順禎攝)

開live的矛盾

問:又要拍節目,又要做司儀,直播工作如何兼顧?

Renee:開live其實某程度上對我嚟講都係一個矛盾,因為我通常都鍾意喺我嘅私人時間去開,但又同緊好多觀眾去講一啲我好私人嘅嘢,呢個矛盾我覺得幾得意,因為明明個空間度得我一個人,但同一時間又有好多人同我傾緊偈,我好鍾意呢個感覺。

在專訪期間,記者要求Renee臨時開live,結果在十分鐘之內,觀眾人次已超過84人。Renee向觀眾表示正接受《香港01》訪問,網民反應熱烈,紛紛向Renee詢問詳情。(陳順禎攝)

拒行性感

問:社交網站入面,經常見你大派福利性感騷身材,在live中亦會作差不多的打扮?

Renee:唔會,如果真係要追溯返,我唔係成日都post,我只係間唔中會post,post只係因為真係去遊船河,真係去沙灘,咁我梗係著泳衣啦,唔通着樽領咩?呢個係正常嘅場合!如果我係要行性感嘅,咁我平常都會著得性感啲啦!如果係賣身材嘅話,喺節目上我都賣啦,Deep V啦,係咪先?但我唔係呀嘛!咁我相信大家都會清楚我到底係咩路線。如果要行我一早行咗啦,我意思係話我後生啲嘅時候,唔洗等到而家,(有心唔怕遲?)我就係無心!

Renee最近受杜汶澤賞識,到其節目《為深夜總是餓》擔任主持。(陳順禎攝)

無需猜度觀眾

問:總會有人因為你的身材和樣貌而看你直播,對此你有什麼看法?

Renee:佢哋Follow我嘅話我會多謝佢哋,例如佢哋讚我嘅相咁,係一件正面嘅嘢嚟,所以無謂要諗到咁負面,因為當你去開一個社交網站,就會係想多啲人睇,就係想同人分享,我唔會去猜度每個人到底諗啲咩,因為控制唔到,點解唔自己諗得樂觀啲呢?

Renee啲IG相,其實幾養眼:

+25

係Friends定係Fans?

問:既然你會將自己的私人事向網友分享,網友又會向你分享心事。你可否說明一下你與網友之間的關係?

Renee:講真,好似朋友咁。即使我同我一啲真係認識嘅朋友,或者係中學同學呀,都唔會成日都見到面,始終大家出嚟做嘢都好忙,雖然我同佢哋(網友)係冇見過面,但個感覺都好似係一啲好耐冇見過朋友咁,我每個星期開live,咁就成個星期冇見面喇,所以佢哋對我嚟講都係朋友。同埋我好少會講係我啲fans,因為我自己唔係好鍾意呢個字眼,我會話係我啲Friends囉,因為我哋嘅相處都係同朋友一樣,又何需要標籤偶唔偶像呢?

(既然是朋友,又能否約你食飯或外出?)咁都會分真實嘅朋友同網上嘅朋友嘅。(陳順禎攝)

後記:直播主與觀眾 關係如「筆友」

既非得到有用的資訊,亦非求養眼滿足好奇心,但又能夠留住觀眾繼續追live,或者就是憑住一種「可靠的虛無」。正如Renee所說,她與網民的關係很莫名其妙,既有真正朋友般的交心,卻無朋友間生理上的互動,既互不相識,卻又相知。

記得多年前白韻琹的電台節目《盡訴心中情》,聽眾就憑一個電話向白姐姐傾訴心事,或傾傾閒偈,真實中卻互不相識;更貼切的,可謂多年前流行的「筆友」非常類似。或者最佳的傾訴對象,就是與自己全無關係,生活上互不抵觸,不會怕「我爆你大鑊」、「用秘密要脅你」等等尷尬場面。

Renee就是擁有一種讓人暢所欲言的感覺,心無城府,即使她未能給「朋友」最佳的建議或解決方案,也總能被她傻氣感染,看看她的直播,起碼能令心情放鬆。

Renee有一個必殺技,就是她模仿比卡超的配音非常神似,很多「朋友」都會在直播期間要求她模仿。不過,Renee對《精靈寶可夢》(前名:《寵物小精靈》)卻不太了解。(陳順禎攝)
+5