【有片】曹永廉紮起十指照玩電話 田蕊妮不禁拍片高呼：出神入化
撰文：洪曉璇
出版：更新：
拍一套戲嘅時間相當長，由化妝換服到等埋位，睇晒劇本大部分藝人都係玩手機過日辰，但係如果好似曹永廉咁，劇情需要十隻手指都包起晒，咁又點算好？你有張良計，阿廉自然有過牆梯，連田蕊妮同余思霆都忍唔住要錄低放上網同大家share﹗
為咗可以用電話，真係能夠激發人類無限潛能㗎﹗（田蕊妮IG）
阿廉、阿田同余思霆正趕拍新劇《她·她·她的少女時代》，呢日繼續開工，等埋位期間人手一機不停上網自娛。阿廉為劇情需要十隻手指都用繃帶包起晒，左右隔籬又掛住玩手機無人理點算好？阿廉先除鞋蹺起腳，右腳腳指公玩WeChat撳掣錄音，睇到阿田眼都定埋話：「包住十隻手指都玩到電話，我深感佩服！」
余思霆都不禁要舉機影低壯舉。（影片截圖）
古有周星星用腳食麵開槍，今有阿廉用腳玩電話，但佢嘅特別技能又點止得一個﹗見到阿田同余思霆都被自己英姿吸引，阿廉又再使出絕技，用口玩電話﹗先將個咀點擊螢幕，做出嘟咀，並用張開口嘅動作縮放照片，睇完一張仲可以鍚住移動睇下一張相，令阿田笑到收唔到聲，大讚阿廉簡直係出神入化呀！