【救妻同學會.專訪】為入屋拍TVB劇? 李任燊:我覺得係好事!

撰文:
最後更新日期:

是做記者入行久了嗎?

近年每逢無綫一有新劇,總會有些同事說:「又係呢幾個演員呀?」

的而且確,近年無綫正面臨離巢潮,佘詩曼、胡定欣、鍾嘉欣、林峯、吳卓羲、黃宗澤等等歷代一線花旦和小生紛紛拍戲或往內地發展,導致近年出現人才荒,留守TVB的演員需要參與多部劇集演出,感覺像不斷重複重複又重複,結果張衛健回娘家參演《大帥哥》、馬德鐘出演《跳躍生命線》、謝安琪參演《殭》等消息就成為觀眾的「大新聞」。而最近熱播中的周日劇《救妻同學會》中出現多張新面孔,除了見慣見熟的胡鴻鈞、劉佩玥之外,相信不少家庭觀眾對其他演員都非常陌生。

Google一下《救妻同學會》wikipedia,資料少得可憐,但搜尋到的劣評連結卻有一大堆。主要有三宗罪:1)青春劇演員並不青春;2)平行時空跳動太過反覆;3)說故事能力極差。(劇照)

首次拍劇衝擊大 應付大量群戲:我會記埋其他人講咩

看過《救妻同學會》的觀眾,由胡鴻鈞飾演的主角李恩朗在青年宿舍中被稱「思朗」,某程度上是由羅諾信不斷重覆將名字讀錯而做成的,而飾演羅諾信的演員,名為李任燊(Kyle),一位來自電影圈,首次為無綫拍攝劇集的演員。

對於第一次拍劇無綫劇集,Kyle感受良多,尤其在劇本對白方面,跟拍電影實在相差太遠:「呢套劇有好大量嘅群戲,台詞亦都好多,群戲嘅時候我好在意,會記好多嘢,演員人數都多啲,十個人一齊講嘢,我會記埋其他人講咩。」

記得周潤發、四大天王、周星馳、梁朝偉、劉青雲等均是先拍電視劇再闖電影圈,而Kyle則反其道而行,莫非是為了「入屋」?他說:「其實每個人都會同我講,一見到我拍TVB就話好,因為入屋,咁我都覺得係好事嚟,冇咩唔好。」

Kyle能夠參演《救妻》,原因是監製關樹明曾看過他在電影《私人會所》的演出,Kyle:「個關鍵係個角色上面有個轉變喺度,可能佢喺嗰度見到我嘅特質,做到一個反差大嘅角色,呢樣嘢係我好開心。」(梁碧玲攝)

為《救妻》劣評如潮解畫:一套劇好少咁多個時空

自從《救妻同學會》啟播之後,網民的批評聲音非常之大,但作為主演之一的Kyle未有因此而感到失落,反而大讚神奇:「記得我哋一班演員同監製一齊去睇第一集出街,我係好驚訝原來真係咁多人睇。當然,每個人都有自己意見,鍾唔鍾意乜都好,但佢哋嘅反應真係快到係即時,我係覺得好神奇。始終同之前我拍電影好唔同,拍完到上畫都已經隔咗一段時間,仲要睇到返到屋企啲人先開始留言。」不過面對劣評,Kyle亦嘗試為劇集解話:「我所知嘅電視劇,相對地好少有咁多個時空,而新嘅嘗試亦好有難度,新嘅亦都好有挑戰性,大家畀多少少耐性,慢慢去理解。」

入無綫拍劇很辛苦嗎?Kyle:「我個人有少少變態,係鐘意俾人折磨,我好享受嗰啲,朝頭早頂唔順我真係好想瞓覺,但唔得,要開工,然後撐上去嗰啲我好享受,我覺得自己好有生命,好似係生命入面每一分每一毫一點一滴都演緊戲。」(梁碧玲攝)

拍《G殺》遇上四個字

能夠在無綫的劇集中演出,對Kyle而言是一總演技上的磨鍊:「我覺得演員係需要彈性,絕對唔能夠話只係演同一個範疇。」《救妻》只是第一部,之後他又會再參演無綫的另一部劇《禍後(暫名)》。而Kyle亦同時繼續在電影圈打拼,在新片《G殺》(2019年香港公映)中擔任主演:「喺《G殺》入面我撞到四隻字,收到嘅時候覺得躊躇、緊張同埋好大壓力。」

李任燊在電影《藍天白雲》中飾演過鄧麗欣的丈夫。(梁碧玲攝)

曾半年沒工開 留在家中模仿劉青雲演戲 

雖然李任燊自覺事業稱得上平步青雲,但亦遇到過失意的時候,試過約半年完全沒工作。180日對演員來說並不多,而Kyle亦沒有將時間白白浪費:「不斷睇戲,不斷睇書,冇人嘅時候就匿埋喺房,想像好多畫面,無啦啦自己喺間房度又笑又喊,好似黐咗線咁樣,(例如?)例如劉青雲喺《掃毒》入面,佢坐喺一間病房,病床,又喊又笑。我自己嘅推斷就係,個劇本應該淨係得一個三角形,四個大字『又喊又笑』。我覺得呢四個字係最難演嘅!」

在《G殺》中,Kyle就遇到「又喊又笑」這四個大字,亦好慶幸自己都收貨:「我拍緊嗰時嘅記憶我都係冇咗,我淨係記得我完咗係踎咗喺度。我後尾睇返見到自己做到呢件事,我係覺得好神奇。我記得我做完隻手係紅晒,但我唔記得自己做咗啲咩。(有目標嗎?)攞影帝囉!我覺得做演員一定要有一個實在目標去行,想做一個角色係應該,係本份。竟然我作為一個香港嘅演員,我最想嘅就係影帝,好老實。當然唔可以好虛無飄渺咁去追啦,但首先要認真對待每一個角色,我先有機會掂到,攞唔攞到唔知。」

李任燊在演出之前都會有一個小習慣:「我會行入廁所,望住塊鏡,望住自己,唔係睇自己靚唔靚仔,係同自己講我今日要做嘅係咩角色,一定要望得到自己個眼神有嗰種感覺嘅先至會出門口。」(梁碧玲攝)

李任燊曾在2011年的校花校草選舉中得到過冠軍,對於自己獲樣子上的稱讚,李任燊更希望獲得觀眾對自己演技上的認同。

李任燊其實都真係幾靚仔:

+5
+4
+3


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。