【蒙面唱將】泳兒落淚透露曾因失聲迷茫 古巨基:妳值得擁有更多

撰文:
最後更新日期:

香港樂壇曾經有一啲唱功了得,被睇好係天王天后接班人嘅歌手,唔知點解總係欠少少機遇,少少運氣未能再上一層樓,泳兒就係其中一人。最近佢參與內地音樂節目《蒙面唱將猜猜猜》第三季,獲得猜評團一致好評,佢仲即場模仿鄧麗君、孫燕姿同王菲嘅歌聲,以唔同嘅發音方式充份展露出佢嘅嗓音天賦,巫啟賢同鍾鎮濤都忍唔住大讚:「太厲害了!」

想當年泳兒出道即橫掃樂壇新人獎。

泳兒(Vincy)以「一枝花仙子」嘅身份參與《蒙面唱將猜猜猜》,喺上一集嘅節目入面佢呢個造型一出場,就俾被網民話係得罪造型師系列。新一集Vincy翻唱咗內地創作女歌手陳粒嘅《易燃易爆炸》。Vincy喺節目上大晒唱功,真假音轉換遊刃有餘,把聲一時溫柔、一時厚實,剛柔並重。唱到高潮位時,爆發力極強,猜評團之一嘅古巨基話:「她的Live永遠都這麼好!」巫啟賢亦大讚佢「變化莫測」;吳青峰直頭話佢係「原唱摧毁機」,「讓原唱的陳粒壓力很大。」

「一枝花仙子」呢個造型,又真係特別咗少少……

Vincy感性分享,有一年時間失聲令佢相當迷茫:「因為家裏有事發生,壓力很大,突然唱不了歌,就連說話也很辛苦。真的有想過放棄當歌手。但我真的非常喜歡唱歌,我想進盡很多不同的方法去醫治自己的聲帶。就真的這麼巧,今年剛好遇到這個節目之前,我的聲音是剛剛癒合了,還可以在舞台上唱歌,所以我特別感動。」揭開面具後,Vincy話香港朋友對佢比較熟悉,喺街上見到都會同佢講好鍾意聽佢嘅歌:「但是這個讚美在我失聲的那一刻,對我來說是非常的心如刀割,因為我可能再沒有辦法唱歌了⋯⋯」之後仲忍唔住喊咗出嚟,「所以非常非常感謝這個舞台給我這個機會,讓大家可以去認識我。」基仔亦有感而發,仲眼紅紅咁同Vincy講:「你真的很好,很努力,你是值得擁有更多的機會。」場面感人。

Vincy非常感激基仔嘅鼓勵,仲邀請基仔上台一齊合唱經典歌《愛與誠》,掀起全場高潮。(微博圖片)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。