【勁歌金曲2018】王梓軒帶領22位新人Acappella 獲大讚有心思

撰文:
最後更新日期:

2018年度嘅樂壇成績表終於全部派發晒啦,得獎獲肯定固然高興,但只要企喺台上盡力演出,觀眾雪亮嘅眼睛一樣會看得見。王梓軒被邀出任《勁歌金曲頒獎典禮2018》表演嘉賓,帶領22位應屆新人合唱《邊緣引力》、《羅賓》及《無盡》的組曲,獲網友大讚相當用心。

王梓軒領軍,帶住22位應屆樂壇新人合唱。(影片截圖)

22位應屆新人來自唔同公司,要一齊去練歌本非易事,其中一個功臣絕對係負責編曲兼領唱嘅導師王梓軒:「其實大家都係專業,佢地對演出都好有要求,望住佢地都諗番起以前嘅自己。所以今次同佢地一切練習幾十個小時,雖然辛苦左啲,但係大家都好享受當中個過程,最後睇得出佢地好齊心用力去練好表演,我地好振奮!」

唔知睇完呢段演出,會唔會勾起大家對呢班新人嘅興趣,嘗試聽下佢地嘅音樂呢?(影片截圖)

為咗呢段表演,眾歌手排練兩星期,希望有最佳效果。作為導師的王梓軒就話樂壇每年都有「後浪」湧現,而且實力、唱功都好有水準,仲令佢諗起以前有份角逐獎項時嘅心情:「其實去到頒獎禮現場,雖然真係一個氣氛濃烈嘅盛會,但本身意義都係慶祝,唔係比較,所以平常心享受個騷最好。依家我都冇以前咁睇重獎項,反而更享受通過各種渠道同樂迷、影迷直接溝通。」



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。