「師奶殺手」陶大宇農曆新年留港陪90歲母親:最渴望接到佢嘅利是

撰文:
最後更新日期:

ViuTV新劇《詭探前傳》預計將於2020年2至3月面世,劇中除了有鄭少秋、陳安立、麥子樂以及沈殷怡等一眾演員參演之外,更會有香港「師奶殺手」第一人之稱陶大宇。 周六陶大宇盛裝出席活動時接受《香港01》訪問,他說:「聽講好似二月或者三月出街,套劇題材比較敏感,又夾雜咗過年,始終係講啲神怪題材,過年過節又唔係好吉利。其實我都幾鍾意個角色,因為我以前都未演過,套劇講我係一個中醫師,唔係呃人嘅,係同人把脈行醫,12點之後就我最惡,變做一個黑社會,賣白粉、殺人,我覺得反差咁大都幾過癮。」

ViuTV新劇《詭探前傳》會有陶大宇出現,係咪好期待呢。(林迅景攝)

談及他近來的劇集拍攝的工作,他直言尚未有劇本在手:「冇!我好坦白,冇!(點解?)其實都懷孕過,不過次次都流產,都有人搵我嘅,不過係時間上唔配合,同埋覺得角色唔係好啱我,我覺得唔緊要啦。我仲健在,我又唔介意等。」他表示,近年工作多是出席商演活動:「我前日先喺武漢返嚟,今日抖咗一日,偷唔到懶,我聽日就要飛去無錫,做到廿幾號就可以收工『安享晚年』。」

陶大宇笑說,這個「安享晚年」其實意指放假回家過農曆新年。「哈哈,其實一直穿州過省,又忽冷忽熱,再加上年齡又大咗,要病住咁做。我希望返嚟之後可以正正式式咁抖下。(一個月『飛』幾多日?)我冇計㗎,有嘢做咪『飛』囉,冇嘢做就留喺屋企,陪下我阿媽囉,其實佢都90歲啦,好犀利吖,希望可以陪佢多啲。」

陶大宇係孝子,幾乎人人都知。今年農曆新年佢仲決定留喺香港陪媽媽過添。(網上圖片)

臨近中國農曆新年,他又會怎樣與90歲的母親渡過呢?他回答說:「新年都係陪多啲佢,又可以趁機休息下。不過我本身就唔係好鍾意過年,唔知係咪因為人大咗呢?(農曆新年鍾意簡單啲過?)唔會周圍飛啦。(過農曆新年媽媽仲會唔會派利是畀你?)會!我生日、出門都會畀我。佢會話:『袋住佢,返到嚟就剝咗佢。』啲錢要使㗎喎,但係入面得十蚊㗎啫。(農曆新年又會畀幾錢?)過年佢會畀一百蚊,我覺得唔係一百蚊嘅問題,而係每年都可以接到佢嘅利是,先係最可貴,錢唔係重要,希望佢身體健康,每年都畀到利是我,呢個先係做仔女最渴望。」

+16
+15
+14


X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。