【專訪】王祖藍執導歌舞喜劇為滿足綠葉情意結:理性啲都唔會做

撰文:
最後更新日期:

王祖藍向來計仔多多,演員、編劇、司儀瓣瓣掂,但自從榮升爸爸後,才發現換片、餵奶,甚至係抱囡都唔多掂。儘管去年因舞台劇、執導賀歲片而多了時間在港,但老婆李亞男未有幸成為最大受惠者,甚至連愛女攞出世紙,祖藍都因為要趕新戲後製而未能同行……「有時就算阿男唔話我,自己都會有無形壓力。」與其內疚,不如好好補救。

對王祖藍來說,去年過得何其充實:11場舞台劇、首次執導、女兒出生。之不過,由於幾件大事都差不多時間發生,顧此失彼令他十分愧疚。「因為應承晒所有嘢先知老婆有咗,係好掙扎,但幸好老婆百分百支持,因為佢知道呢啲係我理想一部分。」李亞男為人慢熱,不會將情緒掛在臉上,身為老公的要預防勝於治療:盡量每晚返屋企吃飯、出埠工作盡量不超過四日兼夜機返港,希望趕及老婆入睡前送上一個goodnight kiss。「陪老婆對我嚟講係好奢侈。」

王祖藍選擇以歌舞喜劇為首次執導作品,既怕令投資者蝕錢,又怕觀眾會「搣飛割凳」,但他仍希望可為香港觀眾提供多一個選擇。(梁碧玲攝)

問到可會女兒出世後,情緒更惡劣,祖藍自信滿滿表示:「我對阿男都唔係太差,能夠在繁忙中都令佢開心,相信將來都唔會太差。」成為人父之後,他突然理解小時候對父親的抱怨。女兒出世時,正忙於舞台劇,緊接又要新戲宣傳,祖藍坦言還沒有時間去感受成為人父的喜悅。「抱佢係好感動,但呢刻仲未釋放出嚟,我需要全日喺屋企對住個囡先會喊到出嚟,可惜我未得閒。」

完成舞台劇之後又要趕《你咪理,我愛你》後製以及宣傳,連想好好抱下愛女再大喊一場嘅時間都無……

最唔理性的作品

連當父親的喜悅也沒時間好好享受,到底《你咪理,我愛你!》是什麼一回事?一個新導演又何解會以歌舞片作為自己的「處男作」?畢業於演藝學院嘅祖藍向來鍾情歌舞片,既然要做,當然揀自己最擅長的入手,不過,中文歌舞片並不是熱門題材,當初找投資者時食過無數次檸檬。「其實真係心口掛個勇字,樂小姐同獎門人(曾志偉)睇完劇本都認為贏可以好爆,輸可以好甘,但亦都覺得既然拍一部普普通通,不如就呢部,成件事真係撐,理性啲都唔會做。」戲中大部分對白都是唱出來的,曾志偉由一開始話唔拍,到最後與毛舜筠、余安安等人愈拍愈投入,撐朋友之餘也撐港產歌舞片。每年都會飛到外國狂睇百老匯舞台劇嘅王祖藍,兩年前開始傾《你咪理》版權,最後在金培達的協助下,成功與原著作者聯絡上,今年4月親身飛到美國與對方見面。他坦言過程「非常難」,直到開拍前才正式簽約。「雖然呢部係歌舞片,但我已經加咗好多商業元素,如果都出事的話,證明香港唔太接受歌舞片。」

曾志偉當初一聽到要唱歌,即時同祖藍講拜拜,仲話可以介紹溫拿幫忙。

綠葉情義結

《你咪理》請來逾60位藝人包括天后鄭秀文、容祖兒、影帝影后曾志偉、毛舜筠、實力派如胡楓、鮑起靜等,綠葉如麥長青、魯文傑、陳國邦等等,當是為了人人有工開也好,為了滿足「綠葉情意結」也好,王祖藍表示「生得唔靚又或者綠葉都應該有自己舞台」是他多年來的製作宗旨之一,所以無論喺《福祿壽》系列、甚至《Sunday扮嘢王》也預留了不同的位置予一眾綠葉,而臨時演員出身嘅阿夢(睡公主)亦從此成了王祖藍御用演員。

鄭秀文、容祖兒等人只得5至10分鐘戲份,為了令大家交出最好的,祖藍出了少少賤招:「我會比晒啲片演員睇,迫佢哋出絕招,有呢種良性競爭、精益求精的心態就絕對唔會hea。當年毛姐佢拍《家有喜事》時,成日都會去八卦另一組拍成點。」

阿夢近年不時出現於王祖藍的作品當中。(梁碧玲攝)

喜劇演員應有的態度

本身只在《萬千升呢福祿壽》其實一個環節出現的她,到後來在《老表你好hea》中,飾演林子善女友,戲份大增。阿夢這天提到祖藍的舉動時,「幸福來得太突然,因為我夢想係做戲,好多戲祖藍比機會我,如果唔係佢,我仲係一個臨時演員。」說時阿夢突然哽咽,殺大家一個措手不及。祖藍表示阿夢每次拍攝時,都能感受到她的快樂,這正是喜劇演員最需要擁有的元素。「除咗要放下身段外,亦都真係要快樂,先可以帶到快樂俾觀眾,同埋佢好專業,每次叫佢做咩都肯做,如果有啲人覺得搞笑好難堪,咁我都無謂迫。」

阿夢呢個招牌黑眼圈其實是因為捽眼眼搞成咁的,並非刻意化妝化出來的。

阿夢從小就已經是電視精,每次看到一些高貴又漂亮的角色時,都會跟著去演,長大後,報讀工聯會的歌唱、戲劇班,也不時投遞個人履歷到不同的臨時演員公司,但甚少有回音,難得機會來了,扮鬼扮馬也無所謂。「喜劇明星一定要靚? 唔靚係未一定做唔到?我唔係靚,但做唔到咩?」阿夢表示有留意網上的留言,記得有次因為劇情需要而攬仔,結果被誤以為「抽水」,令她之後再拍親密戲時都有點怯。

場地:御一共享空間 

髮型:Ted Yeung @ i i Alchemy hair & nail 

化妝: K.T. Tsui 

Styling:Dicky Lee

服裝: Son Of A King



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。