【反黑2】「烏鴉」張耀揚最新合照流出 宋本中:盡力滿足觀眾

撰文:
最後更新日期:

網劇《反黑》前年播出時好評如潮,第二季雖然已經落實開拍,但導演宋本中為求做到最好,花近一年時間去修改劇本。演員方面,除陳小春、陳國坤等上一季的主角外,唔少網民跪求飾演反派飾演到入血嘅烏鴉張耀揚能夠出現,早前宋本中接受訪問時,就話「會盡力滿足觀眾。」而今日,反黑FB專頁就上載了宋本中同張耀揚嘅合照,雖然連caption都無,但足以令網民瘋狂讚好,並指張耀揚寶刀未老。
 

現年55歲嘅張耀揚自淡出娛樂圈後,轉往澳門發展任賭場公關,並與友人在海外合作投資賭廳。(視覺中國)

宋本中表示有同張耀揚研究角色與檔期,如果成事的話,相信《反黑》第二季會更出色。

到底呢張合照是否有所暗示呢?宋本中接受訪問時就笑言似係陀B未夠三個月唔可以公布。「張相代表我真係有努力去滿足觀眾,不過真係要有戲比人做先得。」宋本中透露張耀揚近年主力在澳門做生意,雖然對於《反黑2》甚感興趣,但亦擔心難以抽身。「本身劇本真係有預佢,但嗰個角色現階段嚟講,我都擔心(檔期),所以要再研究,同埋如果真係度到佢期,我都唔想浪費咗呢個大好機會,希望可以有一個真係good fit嘅角色比佢。」

近年於澳門做生意的張耀揚,早前亦有出席港澳賭壇名人葉壽的壽宴。



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。