孖蔡卓妍上綜藝節目瞓身玩遊戲 容祖兒被雨兜頭淋變落湯雞

撰文:
最後更新日期:

早前,容祖兒同阿Sa蔡卓妍參加內地綜藝節目《沒想到吧》拍攝,向來笑料百出兼經常甩漏嘅祖兒今次依然keep住一貫風格,引得全場爆笑;而阿Sa憑住古靈精怪嘅指揮,帶領住女子組贏得全場最高分。

JOEY同阿SA孖住上內地綜藝節目《沒想到吧》,完全不顧形象瞓身玩遊戲。

節目分開男女子組進行遊戲大決戰,環節「雨具大作戰」,如果接錯歌詞就可能會受到淋雨嘅懲罰,而藝人們枱前會彈出嘅另類道具可以擋雨,包括:荷葉、扇、穿窿遮等。喺呢個環節入面,祖兒同阿Sa積極搶接歌詞,不過都係難逃被淋雨嘅命運,接錯歌詞後,手忙腳亂嘅祖兒拎到嘅道具原來係一把爛遮,於是佢直接放棄,索性被雨兜頭淋,仲自娛咁話:「我喜歡水,這樣很美。」然後就對住鏡頭不停擺甫士,令觀眾笑爆肚。

「動作KTV」遊戲則係唱到指定歌詞時要用動作代替,一開始祖兒就失誤唱出指定歌詞,不過佢都好誠實咁自行承認誤。吸取教訓後,每次去到句與句之間嘅空位,佢就會大嗌:「前面小心!」喺佢「機智」帶領之下,隊員獲得最後勝利。

去到「看我來指揮」環節,阿Sa擔任女子組指揮官,祖兒、王祖藍等隊員要喺其他音樂干擾下,除咗睇住阿Sa嘅指揮唱啱拍子,佢仲要根據歌詞含義自創手語,為隊員提示歌詞,例如雙手向上,就係「向着天空拜一拜」、搖頭就代表「別想不開」,最後,女子隊靠住阿Sa騎呢而有效的指揮,為團隊奪得全場最高分。

祖兒近日亦為由陳喬恩、陳曉主演嘅內地電視劇《獨孤皇后》唱主題曲《戎對妝》。(微博圖片)



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。