【開心速遞】康華被隆重招「回家」:病到試唔到造型以為冇得拍!

撰文:
最後更新日期:

康華原來係單立文前度,當年將個女交咗比佢照顧。

《愛·回家之開心速遞》添食加拍至720集,而劇組亦宣布將會陸續加入楊玉梅、彭懷安(Eddie)等人,而Madam Lo盧宛茵亦已喺年初三播出一集以客串形式登場。而喺昨晚一集,康華亦以熊樹仁(單立文)嘅前女友張慧儀身份出現劇集,並追問其女兒嘅下落,過程被紅衫魚、安仔以及若水目睹。由於紅衫魚嘅生活習性與熊樹仁十分相似,再加上張慧儀(康華)對紅衫魚表明自己係媽媽嘅身份,令紅衫魚一時間難以接受。

而呢個女竟然係紅衫魚?!

「親生媽媽突然現身搵女」向來都係大台劇集例必會出現嘅劇集,有網民更指劇情發展落去,隨時會係母女相認後齊齊離港,康華接受電話訪問時就話暫時未知劇集發展係點,但就大讚該劇監製誠意可加,唔排除之後會繼續「回家」。「因為我之前同時拍緊《黃金有罪》、《法證先鋒IV》同埋《飛虎》,根本好難度期,但監製話可以遷就我時間,真係唔知點解佢哋一定要搵我,但都好開心。原先去試造型嗰日,我因為打咗流感針又痾又嘔,結果去唔到,以為都無得拍,點知後尾劇組話再度期去試,真係好有誠意。」
 

康華早前有三劇在身,但由於《愛·回家》監製指定要佢出演,更不惜遷就佢拍攝檔期,令康華感到少少受寵若驚。

康華入行多年,雖然拍過唔少劇集,但原來處境劇集乃第一次。「自己都想再拍,因為嗰日好輕鬆,幾個鐘就搞掂我嘅戲份,可惜當時因為有幾劇在身,所以唔可以留底同其他人好好交流。」康華指昨晚登場後,收到不少粉絲以及朋友的留言,令她決心拍畢《飛虎之雷霆極戰》後,要好好搵《愛·回家之開心速遞》嘅監製商討「回家」事宜。



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。