容祖兒稱希望勝利冇事被圍插 急澄清:不接受不合法不道德行為

撰文:洪曉璇
出版:更新:

韓國天團BIGBANG成員勝利,因涉及性交易等醜聞,3月11日透過Instagram宣布退出演藝圈,亦正式被警方立案變成嫌疑人。原本勝利嘅工作全面剎停,包括原定來港出席昨晚舉行嘅《KKBOX香港風雲榜頒獎典禮》,與容祖兒合唱新歌。Joey被問到勝利一案時,因為一句說話搞到被網友圍攻,要急急發微博回應。

上月Joey上載同勝利嘅合照,本身相當期待同台演唱。(容祖兒IG)

Joey喺2月12日發文透露同勝利錄製新合唱歌,原來昨晚會首次同台演唱,點知遇上呢次性醜聞風波。Joey頒獎禮後接受傳媒訪問時講咗句:「自己都好期待同佢合作,呢刻希望佢快啲冇事。」點知就係因為呢句回應,引嚟唔少網友炮轟,話勝利呢次涉及咁嚴重嘅案件仲希望佢無事,相當無知兼有助紂為虐之嫌。

演出由合唱變獨唱,Joey都表示感到好可惜。(梁碧玲攝)

相信Joey都估唔到一句說話引起軒然大波,佢喺13號中午馬上發微博澄清立場:「一直忙於排練,聽說發生了事情,但不知道已經發展到這麼嚴重。訪問引起大家誤會,十分抱歉。對於任何不合法不道德的行為,我是絕對不接受、不認同、不支持的!以後我也會更加關注時事及謹言慎行。」

經過一晚發酵,Joey喺訪問後不足半日急急發微博澄清自己立場。(容祖兒微博)
+8