張衛健自爆結過三次婚:如果唔係信仰,我感情比韋小寶更複雜混亂

撰文:
最後更新日期:

張衛健昨日去到跑馬地聖瑪加利大堂,與過百名天主教徒分享信仰喺佢人生路上嘅種種事跡。分享會一開始,張衛健提到「如果我唔係信仰,我可能比大鬧天宮時期的孫悟空更失控、我亦有可能比韋小寶嘅感情世界更複雜混亂、我甚至係個唔負責任嘅男人……」但正正係因為信仰,令他能夠克服種種的誘惑。

「如果我唔係信仰,我可能比大鬧天宮時期的孫悟空更失控。」

提到弟弟張衛彝(Henry)去年初暴斃時,張衛健原來正身處泰國渡假,喺趕返香港途中,最令佢感到煩惱嘅係唔知點將弟弟嘅死訊同媽媽講。「到底應該係話Henry死咗?Henry過咗身?定係Henry走咗?發現我一生人寫咗好多劇本、創作咗好多對白,但呢一句,就係短短嘅說話,我諗咗好耐都諗唔到應該點樣講。喺飛機上,太太話『不如同媽媽講Henry返咗天主身邊啦』。」雖然張衛健認為已經有了最好的說話,但他到達媽媽屋企門口、準備撳門鐘時,依然係緊張到不得了。「呢世人未試過咁緊張,出過好多大騷或現場直播都未試過咁緊張,係因為唔知阿媽有咩反應,佢會唔會突然爆血管等等………但同阿媽講Henry返咗天主身邊後,佢好平靜,我以為佢係強裝,但數日後,佢真係咁平靜,真係接受晒我嘅說話,冇因為白頭人送黑頭人而過度傷心。」
 

張衛健提到弟弟張衛彝去年於家中暴斃時,都有少少眼濕濕。

分享會上,張衛健又自爆結過三次婚。他笑言第一次是在十多年前,由於當時仍有偶像包袱,所以就同太太張茜偷偷喺南京註冊。但若干年後,總係覺得欠一個喺教堂內舉行的婚禮,而剛好老婆係菲律賓旅遊大使,當地旅發局提議可在世界遺產之一嘅聖奧古斯丁教堂(San Agustin Church)舉行婚禮,於是他請了香港的一眾好友飛去當地。「點知出發前5日,教堂話太太唔係天主教徒,所以唔理,仲提議我哋喺香港舉行婚禮,大佬我請晒朋友咁點搞?最終佢哋係話可以借出教堂,但就唔會提供神父,成件事真係做戲咁做。完咗呢埸戲之後,又係若干年後,都仲係有少少耿耿於懷,修女提議喺香港辦一個正式的婚禮,於是我就同埋老婆、阿媽、神父同埋修女5個人完成第三次婚禮。」  

張衛健與過百天主教徒分享信仰對他的影響。

 

我最撐男主角競爭激烈,「逆流大叔吳鎮宇」VS「淪落人黃秋生」,快啲把握手上一票,揀心水影帝啦!

《香港電影我撐場.民選大獎2019》投票專頁:https://voteforhkmovies.hk01.com/



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。