泳兒海鳴威相隔十年重聚　合唱惡搞版《我的回憶不是我的》

泳兒（Vincy）十年前與海鳴威合唱《我的回憶不是我的》一曲爆紅，成為K房最hit K歌。Vincy早前同吳浩康於《流行經典五十年》節目重唱呢首經典金曲，觀眾回憶返番晒嚟，令唔少人想搵返失蹤人口海鳴威！

Vincy早前同一班當年拍攝《我的回憶不是我的》MV嘅工作人員一齊聚會，當中包括海鳴威，Vincy話：「最近成日都唱呢隻歌、成日都有人講起呢隻歌，所以send個message問佢：『你幾時會嚟香港呀？聚吓吖。』咁啱佢嚟香港做嘢，所以我哋就約咗出嚟食飯。」Vincy同海鳴威幾年冇見，一見面就合唱返呢首金曲。不過兩個人就轉唱惡搞版「當晚與你記住羅家英」，令在場人士捧腹大笑。

Vincy直言冇諗過呢首歌會爆紅，「當時收到隻歌個時，我係麻麻哋想唱，因為成件事太急，對件事好冇信心。不過我冇諗到隻歌出咗之後會變成自己其中一首代表作，亦都好多謝海鳴威share咗半隻歌俾我。好開心大家可以keep到呢個友誼，呢個友誼好難得。」