張敬軒澳門個唱加場秒速售罄 網友:原價買到我食屎!

撰文:洪曉璇
出版:更新:

香港地想睇演唱會好似愈來愈難,因為好多歌迷會專誠嚟香港睇SHOW,好在而家唔少歌手近近地澳門又會開多站演唱會,香港歌迷總算多個希望。張敬軒舊年喺紅館舉行一連六場嘅「Hinsideout」演唱會一票難求叫好叫座。嚟緊將會喺移師到澳門威尼斯人舉行,早前門票開賣即被秒殺,好多歌迷都話買唔到飛,有見及此,主辦單位亦應詢眾要求,決定加開一場。

軒仔澳門站個唱門票開售致網絡大塞車。(張敬軒IG)

軒仔早兩日喺IG留言話:「四面台的澳門演唱會是第一次做,十分多謝各位支持!Hinsideout澳門站加開一場!見大家咁好,一於又搵幾首sidetrack唱俾大家聽﹗」仲加Hashtag話降兩度都會現身,歌迷聽到當然開心,不過首先要買到飛先得。

軒仔預告降兩度會再現個唱舞台。(張敬軒IG)
+6

有歌迷留言話:「講個萬年不變嘅笑話:原價買到我食屎﹗」成功引嚟軒仔本人回應:「咁我買俾你,你食硬都得喇﹗」不過總有啲嘢係軒仔控制範圍之外,好似噚日朝早加場門票一開賣,又即刻搞到網絡大塞車,好多歌迷都話入唔到個網、買唔到飛,隨後主辦單位宣布門票售罄。唔知軒仔私下聯絡咗呢位歌迷「送禮」未呢?

網友許下豪言,軒仔又奉陪到底,唔知呢位歌迷最終買唔買到飛呢?(張敬軒IG)