李施嬅棄大台進軍荷里活 準備挑戰西片:太有安全感只會原地踏步

撰文:
最後更新日期:

李施嬅4月時喺加拿大頒獎禮上,認識了不少外國經理人,之後再轉飛美國與幾間經理人公司見面。(ig@selenaleelalee圖片)

效力TVB逾15年嘅李施嬅(Selena)今年4月決定離巢,並表示:「孩子長大了,要出去見識了!」過往TVB嘅離巢藝人都會北上賺人仔,但李施嬅就選擇到外國發展,並極速與美國經理人公司Authentic合作,成為「Marvel隊長」Brie Larson的同門師妹。李施嬅接受《香港01》訪問時透露與美國經理人合作是一種緣份。「其實都有傾過幾間,呢間都算係top agency,同埋又有Brie Larson,咁咪試下囉。大家將會喺一個信任同愉快嘅情況下合作,所以完全唔會有話要簽幾多年約,總之有適合嘅project就可以go ahead。」入行多年,李施嬅飾演過不同的角色,今次與美國經理人公司合作,她較為期待與實力派幕前幕後交手,參與有質素的作品。

簽約美國經理人公司Authentic後,李施嬅透露已有工作落實,但只可以透露係拍電影,不過喺開工前,先要返TVB補拍《法證先鋒IV》。((ig@selenaleelalee圖片))

由於與美國經理人公司係以project形式合作,唔似得大台包騷咁有保障,問到李施嬅會否擔心經濟受到影響,她笑言:「無咗TVB呢個大平台係會少咗安全感,但太有安全感的話只會原地踏步,其實自己做咗咁多年嘢,都有一定嘅積蓄,雖然唔係大富大貴,但至少唔會無飯開。」深明外國競爭大,李施嬅表示會不斷自我增值,最近佢就趁有空檔學習空中瑜珈並準備考導師牌,除了是因為興趣同健康之外,李施嬅認為空中瑜珈對打戲會有一定的幫忙。

李施嬅早前與陳法拉、馮德倫齊齊被美國媒體The Hollywood Reporter報道。

李施嬅表示決定離開TVB時,當時既沒有任何工作上的計劃,亦沒有任何外國經理人公司向她招手,此舉在外人來看是十分冒險,但她卻抱著「要發生就一定會發生」的心態去面對。「feel到自己係要做啲唔同嘅嘢,如果唔而家做就唔會再有膽去做架啦。當然自己都有短暫嘅confuse,怕拖下拖下個人會消失咗,就咁無咗,不過呢啲都係夜晚瞓唔著嗰時諗嘅低B嘢。」
 

李施嬅早前憑加拿大劇集《Blood And Water》(《血與水》)獲得「2019年加拿大銀幕獎」(2019 Canadian Screen Awards)的女配角提名。(ig@selenaleelalee圖片))

李施嬅與「Marvel隊長」Brie Larson成為同門。(網上圖片)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。