森美開咪打氣 稱長途賽望港人放鬆點:唔好用晒啲energy

撰文:
最後更新日期:

森美《早霸王》中指香港人將面對一埸持久戰,他希望大家可以和平面對之餘亦不要洩氣。(IG圖片)

立法會今日恢復二讀辯論《逃犯條例》修訂,不少熱心巿民今日響應罷工罷巿罷課。森美於凌晨時分喺IG上貼出林憶蓮主唱《願》歌詞,唔少網民都紛紛留言:「大家心照」,而喺今早嘅電台節目《早霸王》中,身為主持嘅森美用上半個多小時為香港人打氣,期間他提到自己有留言昨晚(11日)的直播,並深感香港人將會面對一埸持久戰。「我覺得最緊要係大家唔好用晒energy,大家都知道呢個係持久戰,戰字嘅意思係個賽事比較長,希望大家放鬆少少慢慢嚟。」

森美於IG貼出林憶蓮主唱《願》的歌詞,獲不少網民讚好。(IG截圖)

森美之後提到自己身邊有不少打政府工的朋友,而部份更身任要職。「同佢哋傾開先發現原來佢哋都有出去(遊行),問點解嗰陣,佢咃嘅答案比我覺得,香港人呢段時間個心對將來無希望嘅感覺,佢哋全部都係有家室嘅人,其中一個話『行埋今次可能無得再行啦』,呢個心態好似係香港人真係感到好絕望。」
 

「我哋而家可以做嘅嘢係每一次投票選舉時,投選代表到你嘅人入議會先係最緊要。」(IG圖片)

森美表示自己對政治唔多認識,故以生活作為例子:「身邊有啲朋友嘅老闆好得意,佢哋好鍾意用一啲藉口去叫下屬跟做一樣嘢,而呢個藉口點都唔會係favour,但因為佢有原因嘅關係你就要聽。好多人都話離開香港,但我唔覺得離開係真正選擇,因為我唔見得呢個世界,係有一個地方可以無任何問題發生、令人安居。我個人比較正面,即係如果可以修補就去補,就算你係植物人我都會同你講……將來嘅日子仲有幾多次要同……植物人傾偈呢?當植物人要決定時,議會入面又有幾多代表到你嘅人呢?我哋而家可以做嘅嘢,係每一次投票選舉時,投選代表到你嘅人入議會先係最緊要,我今日唔會彈性返工,我返工係因為我想講我嘅說話,好過我喺屋企,香港人努力。」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。