【如果這樣生活】經歷婚姻失敗後仍相信愛情 陳煒:以後睇嘢好清

撰文:
最後更新日期:

離婚後,陳煒寄情於工作,感情一直未有著落嘅佢喺拜月老時,透露「有目標」。(影片截圖)

於08年下嫁台灣商人嘅陳煒,喺最新一集《如果這樣生活》中,重返昔日有唔少甜蜜回憶嘅台灣,並剖白離婚嘅原因。「事業同愛情你會點揀? 11年前我選擇了愛情,覺得為咗自己心愛嘅人可以放棄一切,佢係我世界嘅全部,無諗過……原來愛情會有消失嘅一日,然後又回歸到原點,一個人生活,繼續我嘅演藝事業,成為觀眾心目中嘅最受歡迎電視女角。」

陳煒於08年秘密下嫁比自己小3歲嘅台灣商人顏志行,婚後煒哥宣布退出娛樂圈不再拍劇,直到2012年復出。其後,煒哥於節目《煒哥的味道》中搵埋老公上陣,但原來當時二人已離婚。(影片截圖)

對於離婚一事,陳煒曾經表示一度要睇精神科,而佢亦曾在訪問中話過:「前夫太專注事業,時間耐咗,我就好似屋企電器咁放埋一邊,咁做朋友好過做夫妻。」喺節目中,陳煒表示仍然相信愛情,喺拜月老求姻緣解籤時,被問到「現在有喜歡的人嗎?」時,佢就笑笑口表示:「都有啲範圍,但未落實。」當得知籤文解讀為「朦朧的狀況」後,陳煒並未因而感到擔心,仲話「由而家開始有目標,同埋我配咗眼鏡,以後睇嘢可以好準同好清。」

「有時係故意收埋自己嘅情感、保持住好冷靜,唔會話將情緒起伏表現喺塊面。」(影片截圖)

陳煒喺節目中講及上一段婚姻時,似乎仍然有少少傷感:「傳媒其實一路都好關心我嘅感情,見我唔講唔講咁,我之前一路都唔講係因為想保持住呢段關係,我覺得可以有挽救嘅機會,所以唔想講,我自己都唔想分開講真,呢個唔係我嘅意願,離婚呢樣嘢係佢提出,佢覺得佢嘅工作上有啲事佢要去處理,要擺好多時間,亦覺得佢有虧欠我,既然佢無能力付出佢嘅感情,亦有好多嘢要處理嘅時間,就覺得不如中斷呢段關係啦。」陳煒早年喺拍攝綜藝節目時,曾搵埋老公出鏡,直到2017年被爆二人已離婚5年時,她才承認二人已分開一段時間。



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。