【早霸王】男聽眾對住女神每事google 森美:就算一齊都會爆炸

撰文:
最後更新日期:

男聽眾有社交障礙,森美想幫都唔係咁易。(影片截圖)

由森美、小儀同Marco主持嘅《早霸王》「你知道唔知道有人掛住你」環節,撮合過不少情侶。之不過,今次男聽眾亞Gi嘅狀況,就連森美聽完之後都覺得非常渺茫。
亞Gi表示自己係透過交友apps結識對方,傾咗幾星期後開始約睇戲、繼而係行街食飯,「差不多日日見」之餘,有拖手又有咀咀,之不過,對方似乎一直都未應承呢段男女朋友關係。而亞Gi仲話之前因為發生咗啲事,令雙方關係變差,甚至係「已讀不回」,到底係咩事呢?亞Gi話:「最主要係同佢溝通有問題,有時同佢講嘢我唔出聲。」之不過,到底女方講咩令到亞Gi可以唔出聲,佢又話一時諗唔起,只係話有同過對方表示自己唔係好識答,需要啲時間google search。

表白對象原來係要講英文,搞到森美、小儀好混亂。(影片截圖)

為此森美都十分好奇,並細心同Gi分析,最後得出嘅結論係:「你同佢係唔對咀,有時當男仔比女仔叻,咁可以照顧到對方,但當情況對調時,未必係咁好。又或者係我對件事無睇法,但都可以有嘢講,我有朋友係問親佢嘢都答唔到,做唔到舉一反三,如果你將來同佢喺埋一齊,而佢又唔係鍾意呢類人,佢會爆炸。」森美指亞Gi太在意一個好嘅答案,但其實好多時女仔只係想溝通,而並非想得到一個好實在嘅答案。「愛情就算做啱晒,都可以唔鍾意你。」他同時安慰亞Gi,指每段關係都可以令人成長與學習。

收線之後,森美第一句就係「豈有此理」。(影片截圖)

電話接通亞Gi心誼對象Divina後,由於工作環境關係,所以Divina一直以英文作答,搞到森美都難以入手,最後Divina以「我可唔可以遲少少打返比你」為由收線……收線後,森美都忍唔住表示:「豈有此理」並認為亞Gi靠害,唔一早講明原來係要以英文進行,又笑言自己英文程度只係去到lady and gentlemen,並謂「其他果啲我要查同寫稿先」最後,亞Gi只能單方面發表發的宣言,雖然佢話會努力改善溝通問題,唔會令對方有被遺棄感覺……但睇怕呢段感情都唔會有好結果。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。