羅樂林同陳寶珠細妹離婚仍同居:緣盡點求都無用

撰文:鄺鈺瑩
出版:更新:
羅樂林同陳寶儀(右2)離婚後依然繼續一齊住。(資料圖片)

喺《愛回家之開心速遞》飾演龍敢威(大龍生)嘅羅樂林,於劇中除有3位太太之外,亦都有唔少年輕嘅女伴,總之永遠都會寂寞。現實中,羅樂林亦有3名寶貝女愛鍚,去年70大壽,三個女更夾埋多名好友為佢搞神秘生日會,既溫馨又甜蜜。曾經有過兩段婚姻嘅羅樂林,日前接受商台節目《1圈圈 》訪問時,提及21歲時嘅第一段婚姻時,就表示當初確係好開心,但慢慢就有好多事出嚟,而唔成熟亦係其中一個致命點。
 

佢應該係緣份嘅一種。(影片截圖)

至於第二段婚姻,太太陳寶儀嘅姐姐係粵劇名伶陳寶珠,羅樂林指拍拖初期,由於自己只係一名死𡃁仔,所以多少都有點壓力,而陳寶儀嘅媽媽宮粉紅亦都十分反對。「後來相處多咗,佢好錫我,每次食飯都會叫我一齊飲兩杯。至於三家姐(陳寶珠),無論係孝順、成就都好值得去學習同尊重,佢對媽媽、長輩真係無得講。」

提到三個寶貝女,羅樂林話雖然佢哋都長大,但作為父親,就算囡囡到60歲都都一樣擔心。

羅樂林與陳寶儀於82年結婚並育有一女,於2011年宣布離婚時,表示仍會繼續同居,對於呢個做法,羅樂林喺節目中就話:「同一屋簷下,買餸煮飯都係我,我甚至會煮埋比工人食……以為大家佛教,而家佢信基督,大家諗法唔同,對社會睇法我同佢絕對唔同,咁都唔緊要,總之大家唔好講政治唔好講宗教,你鍾意做咩就做,無咩所謂。」他亦表示深信緣份,緣嚟點都走唔甩,緣盡點求都無用。
 

離婚並不一定孤單,睇睇羅樂林同三個女關係幾好就知。

+4

講羅樂林又點少得數佢一日死五次?

+1
你可能感興趣