陳芷尤返新加坡做女主角 片酬待遇倍增:唔考慮返TVB啦

撰文:鄺鈺瑩
出版:更新:
學過5年泰拳,又玩過MMA嘅陳芷尤,輕鬆面對《新兵正傳4》嘅動作場面。(xoxoapo IG圖片)

曾在《城寨英雄》飾演四朵金花之一嘅陳芷尤(Apple),自從與張振朗分手後,隨即轉戰新加坡發展,並以國民電影《新兵正傳》打開知名度。本身喺新加坡長大嘅佢,講得一口流利英文,再加上打得又睇得,令陳芷尤拍畢《新》後,接連有電影以及網劇搵上門,過去一年多時間,陳芷尤將工作重心轉移到新加坡以及台灣,香港呢?只限探親。她接受《香港01》訪問時表示:「其實同TVB約都算完咗,雖然之後有傾過,但應該都唔會繼續。」

30歲嘅陳芷尤於《我的左鄰右里》中扮演學生妹,佢笑言雖然唔係好突兀,但應該都係最後一次。(受訪者提供)

之所以完全唔考慮TVB,除咗係因為未試過拍電影之外,喺新加坡嘅待遇亦甚為吸引。「價錢當然係好過TVB先會咁揀,同埋因為我喺香港藝人,所以又會再比多啲。」講完價錢,又不如講下工時,陳芷尤表示喺新加坡拍劇/戲,規定每日最多12小時、拍7日放1日,完全唔似得大台劇集,有開工無收工,所以整體來說都算輕鬆。「其實當初拍《新》時,最大擔心係因為呢個作品前幾集都有好好票房,我要加入時,好多人都會問點解搵香港藝人,自己係有壓力,好在出到嚟嘅反應都好好,年底會開第5集,我都會繼續參與。」
 

唔返香港唔緊要,最緊要記得派福利圖。(xoxoapo IG圖片)

由梁智強執導嘅《新》,係為紀念新加坡國民服役制度45周年而拍攝嘅作品,電影在當地上畫時,榮登新加坡影史上最賣座的華語片,亦因此帶來了續集嘅商機。陳芷尤當初透過朋友介紹下得到試鏡機會,她二話不說飛到新加坡與導演見面。「因為自己有睇開《新》,同埋未拍過電影,所以朋友話可以試鏡時,我諗都唔諗就飛咗去新加坡。」此外,她過去一年,亦先後與台灣女神安心亞合作電影《殺手不笨》、網劇《神奇之吻》、《我的左鄰右里》,就咁睇,都見到機會比大台多好幾倍,試問識得揀都都知道點揀啦。

陳芷尤喺新加坡有屋企人同朋友,所以佢一啲都唔覺悶。(受訪者提供)
+5