羅仲謙回巢拍劇不忘放閃:想多啲時間陪老婆

撰文:
最後更新日期:

近年主攻電影嘅羅仲謙,終於準備回巢拍劇。(官方圖片)

羅仲謙同楊怡婚後恩愛程度一直有增無減,為咗可以令老婆做幸福少奶奶,羅仲謙近年更頻頻北上賺人仔。不過,為咗可以多啲時間陪老婆,兼進行造人大計,有傳羅仲謙將於8月返TVB拍劇,而對手更係一線花旦。剛於上海完成電影宣傳嘅羅仲謙接受《香港01》訪問時就話:「等TVB公布啦,其實一直都有傾緊,大家都非常之有誠意。自己都想多啲留喺香港,一來可以陪老婆,二來真係好耐無同香港觀眾見面,希望傾得成,咁就可以同兄弟班合作,我自己一直都想返去拍嘅。」
 

羅仲謙對上一次拍大台劇已經係16年嘅《潮流教主》,同劇仲有陳豪、蔡思貝、陳 瀅等人。(官方圖片)

羅仲謙對上一次拍TVB劇集已經係2016年嘅《潮流教主》,再與大台合作,問到會否乘機加酬,羅仲謙笑而不答,但問到會否叫埋老婆楊怡一齊拍劇,佢就話一啲都唔介意:「自從《On Call 36小時》之後,就無同太太合作過,我都希望將來有機會可以同呢位民選視后合作!」呢位愛妻號果然名不虛傳。

羅仲謙當年因《On Call 36小時》與楊怡撻著。(官方圖片)

對於回巢一事,羅仲謙抱樂觀態度,相信成事機會十分高。據知,由他與任達華主演嘅電影《小Q》,將於8月喺香港上映,屆時羅仲謙將留港宣傳,如果真係拍劇的話,簡直係配合得天衣無縫。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。