【開心速遞】Venus復活回歸 鄺潔楹預告組新CP:希望大家記得我

撰文:
最後更新日期:

由第475集,Venus就失蹤了。不過經過了200多集,今日(7月12日)鄺潔楹(Judy)就正式宣佈Venus復活啦。(電視截圖)

《愛·回家之開心速遞》在不斷有新角色加入之餘,亦有不少角色消失,其中一個在網上擁有高人氣的角色,Bonnie(林凱恩飾)的好朋友Venus(鄺潔楹飾)自上年11月播出第475集後,就「被消失」了,讓不少網民都大嘆不捨。不過,鄺潔楹(Judy)今日在IG上表示,她又再回歸《開心速遞》大家庭了,說:「好一段時間無做愛回家之開心速遞,還是很有愛。」

劇組一班演員仲幫Judy慶祝生日添,好有愛吖。(IG圖片 / judy.kwong)

Venus消失100多集再回歸 鄺潔楹:希望大家仲記得我

鄺潔楹(Judy)接受《香港01》訪問時說:「其實我自己都唔記得幾耐啦,淨係知自己有一段好長嘅時間。係直到最近拍返《開心速遞》,嗰個P.A.都係上年嗰個。咁我就見到原來對上一次佢畀(拍攝)通告,已經係10月尾嘅事。我仲記得嗰一集係講緊『道德訓練營』。我而家係拍緊第600幾集,即係Venus原來係有成100幾集冇出現過,嚟緊會交代返點解Venus消失咗,希望大家仲記得我。」

今年5月鄺潔楹(Judy)正式畢業娛樂新聞台,讓不少網民擔心從此就不會在TVB見到她。(受訪者提供)

預告Venus會有感情線 CP對象要保持神秘

她也透露,Venus將於第648集開始出現:「我收到劇本嘅時候都好興奮同埋好緊張,一嚟對白都幾多,可以講嘅,就係有感情線埋伏,同埋都劇情都幾意想不到。緊張呢,係因為我已經好耐冇拍過劇,上年主要係做綜藝節目。綜藝節目雖然有少少話劇元素,但係做綜藝都會誇張少少,始終同拍劇都有啲唔同,所以返去拍劇都會有啲壓力。」會與誰組成新CP?她表示要保持神秘:「遲啲出街你就知,拍擋話要等觀眾估下。」

鄺潔楹捱壞身子派散水湯講拜拜 年半冇放過假:我啲經期亂晒!

鄺潔楹(Judy)常常為《3日2夜》擔任主持。(受訪者提供)

簽約成「親生女」Venus即復活:會有多啲工作安排

為何會突然回歸《愛·回家之開心速遞》呢?雖然她沒有解釋,但就好可能是她與無綫正式簽了經理人藝員合約(即行內俗稱的「親生仔女」合約)有關。她說:「而家合約就係屬於TVB經理人合約,之前喺娛樂台畢業,其實都諗住再搵多啲新嘗試。拍劇係其中之一,我知道公司嚟緊都會喺劇集方面有多啲安排,呢個就要保持秘密先。不過綜藝方面我都唔會放棄,因為我都好鍾意嗰面,例如《學是學非》就好膽咁實驗,《3日2夜》就可以去旅行去玩,吃喝玩樂我又鍾意,所以兩邊嘅工作我都會Keep住做。」

+8
+7
+6

1.55米身高會否成為拍劇阻礙?她笑說:「都無得驚嘅,係事實黎㗎嘛,係蝕底啲嘅講真。不過我同公司反映呢個問題嘅時候,佢哋仲安慰返我話:『可以企箱拍,影唔到㗎!』所以,咁樣就會令我更加想喺演戲方面做好啲,等大家唔好睇留意我高度,同埋一開始邊會有機會比我拍住王浩信喎呢個級數同身高嘅演員喎,我有排都未去到佢既Level,所以唔驚啦。」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。