何超盈囡囡荷包蛋首曝光　改名Audrey Rose源自柯德莉夏萍

賭王千金何超盈早兩日榮升媽媽，為未婚夫辛奇隆（Thomas）剖腹誕下8磅重BB女，比預產期早兩星期。大家一直叫BB女做「荷包蛋」，原來已經改咗名，呢日BB女樣貌仲首次曝光。

四太梁安琪升呢做婆婆後，29號於醫院接受訪問時開心透露，孫女好多頭髮個樣似足媽媽。呢日終於見到「荷包蛋」個樣啦﹗超盈朋友於IG上載照片，見到瞓喺醫院BB床上嘅「荷包蛋」好夢正甜，面圓圓肥嘟嘟，頭髮相當濃密，眼線好長相信係個大眼美女。

相片中仲寫上「Welcome Baby Audrey Rose」相信應該就係「荷包蛋」嘅英文名。Audrey源自經典女星柯德莉夏萍，據知賭王同四太都好鍾意柯德莉夏萍嘅電影，超盈英文名Sabrina都係來自柯德莉夏萍嘅電影，兩母女唔只似樣連英文名都有關連，真係好甜蜜呀。