泳兒許靖韻撞樣似足餅印 接受挑戰55張相中搵出自己

撰文:
最後更新日期:

圈中有唔少藝人明明無血緣關係,但偏偏生到餅印一樣,似足失散兄弟姐妹,古有鄭秀文楊千嬅,近年就有泳兒同許靖韻,仲要同公司經常一齊現身,一個唔留神都會認錯﹗呢日泳兒接受香港開電視《娛樂頭條E-news Headline》主播馬梓軒(William)專訪,兼做個小測試睇下佢自己會唔會認錯。

泳兒接受香港開電視《娛樂頭條E-news Headline》主播馬梓軒(William)專訪

節目中泳兒於55張師妹許靖韻照片中,要搵返自己出嚟,最終佢只係用咗3秒就輕鬆完成挑戰,佢笑言:「其實唔止同許靖韻似樣,我以前讀書嘅時候,好多人覺得我同一位同學個樣係似到會叫錯人!不過我又唔會尷尬,只係覺得好好笑,上帝應該做咗好多呢個樣,然後散播喺呢個世界!」

泳兒於55張師妹許靖韻照片中,要搵返自己出嚟

大家又搵唔搵到邊個係泳兒呢?

雖然人有相似,但泳兒嘅歌聲絕對係獨一無二,佢諗返起2016年舉行入行十周年演唱會後,經歷失聲長達一年幾,坦言失聲令事業陷入低潮:「嗰時心情都幾差,因為自己身體唔太好,亦都冇遇到一啲機會去開演唱會,所以我覺得有心無力,加上自己際遇,其實嗰時心情係屬於其中一個低谷!」

同門師姐妹其實真係好似樣(IG:vincychan ,angelachingwan)

回復狀態嘅泳兒,同很多歌手一樣希望踏上紅館開騷。當被問到現階段同髮型師男友Ziv拉埋天窗,還是登上紅館比較快,泳兒表示:「呢啲嘢就冇時間表嘅,我覺得如果你問埋Ziv嘅話,我覺得佢都會想我上紅館先!我都希望將我第一個紅館演唱會,交畀佢做我嘅髮型師!」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。