譚詠麟廣告Facebook無限洗版 網友崩潰:到底畀咗幾多錢

撰文:
最後更新日期:

一個藝人廣告愈多曝光率愈高,通常代表愈紅,不過凡事總有例外。大部分香港網友呢兩日上Facebook,應該都發現不停見到譚校長,幾乎每隔三個post見一次,簡直好似「譚詠麟鏈」,即使不停report都好似野火燒不盡咁,簡直好似新一代都市傳說。

呢幾日一開FB就見到譚詠麟。(Facebook圖片)

唔係豪宅就私人飛機。(Facebook圖片)

睇返呢類廣告,都會有譚校長大大個嘜頭,加豪宅或私人飛機或名車嘅相,再唔係就拎住一張好多個零嘅支票,但好明顯係Key上去嘅,文字都係講「譚詠麟的投資心得」,繁體字同簡體字都有。如果Click入相關廣告,都係關於比特幣(Bitcoin),仲有部分用上譚校長接受ViuTV主持羅沛琪訪問嘅相片,以增加可信性。

洗版洗成咁,點止專家無語,網友都好無語。(Facebook圖片)

其實譚校長所屬公司喺8月已經出過聲明,表示已經備案並保留法律追訴權利,沉寂一排又再湧現,而且見一個Report一個,依舊不停見到唔同專頁推出嘅譚校長廣告,呢啲專頁大多係開咗冇幾耐以及只有幾十Fans。網友都好崩潰咁問「到底畀咗幾多錢同時間先可以洗版洗到咁?」

8月16日譚校長所屬公司已經出過聲明,最近譚校長再次轉載提醒網友唔好受騙。(譚詠麟Facebook)



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。