【影片】《江湖悲劇》譚詠麟隔三十年再演古惑仔 陳小春給百幾分

撰文:
最後更新日期:

香港江湖片長拍長有,今次輪到好耐無拍戲演主角的「校長」譚詠麟,拍住「古惑仔」專業戶陳小春演新片《江湖悲劇》,二人接受《香港01》專訪談拍攝趣事,問到校長表現如何,小春大讚話有百幾分,是「有組織及嚴重罪行」地想衝擊金像獎問鼎影帝寶座。

陳小春與譚詠麟為爭龍頭大哥的位置而鬥個你死我活,但奪位後又另有一番滋味。

小春睇好校長做影帝,自己能夠獲得一次提名就心滿意足。(馬熙烈攝)

校長近三十年前演《江湖情》,今次扮黑幫大哥別有一番感受。(網上圖片)

「以前我拍嗰套叫《江湖情》,都超過廿年,今次呢套戲係做大佬,感覺幾過癮,就拍囉。」譚詠麟近二十年沒有主演電影,出山之作演江湖大佬只為過戲癮,自言以前仰慕周潤發,想成為對方入室弟子,今次演手下遍佈全港九的龍頭大哥,演他擅長的喜劇,好玩開心就好。

演過多部江湖片的小春就話沒甚心得可以傳授校長,亦對對方表現讚不絕口,透露校長開工前一晚都做足功課,又清楚每場戲的安排,笑言似上了賊船:「他根本是『有組織及嚴重罪行』想攞金像影帝。」校長聽罷大笑,謙厚回應:「獎項全部都係Bonus,呢啲隨緣,最緊要係過程。」

小春指其角色與校長平起平坐,加上有導演及編劇在場指導,無需要交流演古惑仔的心得。(馬熙烈攝)

小春指應付校長的即興演出綽綽有餘。

貴為一代香港歌王的譚校長,不單首首金曲都唱到人琅琅上口,其「甩嘴」風格亦夠街知巷聞,對他來說記歌詞還是記對白難?他有以下解法:「我同超人(導演林超榮)講好,我演唱會嘅歌詞都唔記,唔好旨意我記對白,拍嗰陣我講個意思出來就算,圍戲時講好大約粗略點做,起咗個頭係咁,中間有變化。」

校長笑言其他演員每次埋位可能都心驚膽顫,但小春就話對校長的「爆肚」應付自如:「中間爆咗啲嘢咪『哼』一聲冷笑,其實在大笑,好多這種情況出現,但不明顯的。」

要數最難忘一場戲,校長認為是坐在輪椅被小春迫落樓梯一幕,不單場面驚險,仲有好多內心交戰。(馬熙烈攝)

校長指與「三嫂」戚美珍及伍詠薇合作撞出不少火花。

談善言於戲中飾演譚校長女兒,緊張得要對方安慰。

《江湖悲劇》找來蔡瀚億(BabyJohn)、蔡潔及談善言等新生代演出坐鎮,校長向飾演他女兒的談善言傳授演戲要訣:「佢幾日冇瞓覺,好驚好驚,我同佢對對白,已經發現佢口都震晒,我話唔需要咁樣,最緊要好玩,尤其是拍喜劇,你一定要覺得你帶到個mood出嚟,觀眾先會開心先會笑,佢就放鬆咗。」至於BabyJohn,校長讚他有經驗兼轉數快,所以不需要擔心。

小春對蔡潔就有另一番見解:「我發覺佢真係有啲似梁詠琪,似(梁詠琪)剛剛出來時,玉女咁嘅款,但現在『玉女』咁快爆出有男朋友,就冇得玉女囉……」校長亦大讚蔡潔有潛力,仲有好多可以發掘的地方。

校長與小春大讚蔡瀚億與蔡潔表現出色,尤其後者潛力十足。

場地提供:E-MAX
譚詠麟化妝:Eva Chuk@Faces make-up studio
譚詠麟髮型:Perry Tang@Silkcut Salon
陳小春化妝:Andy Leung@ndnco
陳小春髮型:Beijing hair culture clifflan



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。