泳兒東龍島拍MV下海玩濕身 「成個浪冚埋我塊面」

撰文:
最後更新日期:

下個星期三(16日)於九展舉行演唱會嘅泳兒(Vincy),推出新歌《花心》,係佢今年推出三首「花系列」為主題歌曲中最後一個章節。泳兒表示第二部曲嘅《野木蘭》講述人性暗黑面,《花心》則透視人性內心深處:「每個人心深處都會有一啲渴望、貪心或者花心嘅念頭,心裏面有啲嘢好想做又唔敢做;又想做呢樣、又想做嗰樣,我覺得『花心』係人嘅本性,冇對或錯。」

泳兒為演唱會落力綵排。(IG:@vincychan )

呢次MV去到東龍島取景,原來呢個地方對泳兒好有回憶:「嚟緊演唱會嘅poster就係喺東龍島影。我仲記得上次成三十四度,有工作人員中暑、有啲熱到扯爛自己條褲散熱。」上次攀山,這次則要下海玩濕身:「今次冇咁曬,今次主要係落水。我要浸喺水入面,但面唔落水,導演諗住只係浸一下,但係我哋敵不過大自然,因為啲浪一沖過嚟,有一吓大家都『嘩』咗一聲!成個浪冚埋我塊面,都飲咗幾次海水。同埋雖然唔係喺水入面浸咗好耐,但一上水就發覺浸到皺咗皮,哈哈。」

今次去到東龍島拍攝,原來呢個地方對VINCY有特別回憶。

MV繼續由《野木蘭》MV導演Sheng Wong及Fmlik操刀,泳兒透露是暗黑系列延續:「延續番《野木蘭》內容,《野》MV講天使同魔鬼慢慢轉化成人,嚟到《花心》就係當佢哋變成人之後,佢哋會想做啲乜嘢呢?做咗人之後又會唔會係佢哋想像中咁開心、咁多姿多彩?」泳兒在新歌MV中飾演Falling Angel,轉化成人後擁有超自然能力,所以MV入面會見到佢有唔少懸浮鏡頭。

本身導演唔使VINCY成個人濕晒,可惜人算不如天算。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。