【牛下女高音】TVB被指存在白色恐怖 鄭敬基:聽過有人叫我乖啦

撰文:
最後更新日期:

自從無綫宣布劇集《牛下女高音》將以台慶劇姿態播出後,其周邊新聞的討論熱度比劇集內容更加豐富,例如經過今年4月在女主角黃心穎身上發生的「安心事件」再被翻熱、黃心穎有否拖累劇集成績、對《牛》劇成為台慶劇的揣測、劇中主要角色鄭敬基在演員名單被除名等等。日前,鄭敬基接受商台節目《一圈圈》主持梁泰來的訪問時,他親自剖白了當時「離開」的心路歷程,更直言認為TVB內部是有「白色恐怖」。

鄭敬基接受商台節目《一圈圈》主持梁泰來的訪問。

演員名單「被除名」

鄭敬基在無綫劇《牛下女高音》中飾演一名的士司機「游子」,其演出獲不少人讚賞,他在節目上笑言:「好多人都話我演得好似,連我阿媽都話我幾似的士佬。」然而,擔重戲份的他,卻缺席所有宣傳活動,甚至連官方的演員名單上,「鄭敬基」三字也不翼而飛,鄭敬基並不諱言:「呢個就係Official嘅  Termination啦。宣傳有人搵過我嘅,監製亦都有搵我,佢打電話嚟問我近況,又問我有冇出吓去(遊行)呀咁,又聽過有人講:乖啦,你咁樣做,有好多人擺咗心機㗎,咁人哋咪冇得……(你覺唔覺得TVB有白色恐怖?)我唔希望有啦,不過我覺得係有嘅。」

鄭敬基已出道33年。(鄭敬基Facebook)

作為藝人的心聲

近日有不少藝人包括林秀怡、林泳淘、李佳芯以及鄭敬基等,紛紛因為他們為政治發過聲而被認為因此「被離巢」或「被雪藏」。而事實上,鄭敬基在6月27日被影到參與元朗遊行之後,就沒有收到過由TVB向自己的「續約」邀請:「其實原本份約就去到7月,5月嘅時候叫我快啲返嚟簽咗佢。」但最後合約簽訂事宜亦不了了之,《牛下女高音》成為他最後一部無綫劇集:「當時我係相信希望唔會係因為我嘅政治取態去發聲而影響咗呢樣嘢,因為我覺得,香港人係要為香港做嘢,呢樣嘢我覺得係好啱吖,同埋係我自己私人時間嚟㗎嘛。但當一啲事情,愈嚟愈顯而易明,就係呢一個原因,我覺得作為一個藝人,就係應該以你個身份就係要做嘢喇,起碼你引到人留意先啦。」

為TVB講好說話

雖然鄭敬基的離巢被很多人視為「白色恐怖」的明顯例子,但他個人亦沒有因此而感到不忿:「我係仍然係多謝嘅,我只係希望呢間我由細睇到大嘅公司,唔好畀喺嗰度做嘢嘅人咁辛苦,唔好有呢一種嘅精神壓力,如果有個員工個女係要去遊行嘅,咁我陪唔陪佢去呢?陪我個女去遊行我會唔會冇咗份工呢?咁我係要保護個女定還是冇咗份工呢?如果有呢個諗法嘅話,我覺得嗰個員工好辛苦。」鄭敬基更替TVB的「取態」護航:「講緊一間公司嘅取態,而下面過萬員工會因為咁冇咗份工,咁嗰個做決定嘅人要點做呢?所以我只能夠以一個個人身份去講,亦都唔去揣測,因為佢個持份者係完全唔同以前。」

+6
+5
+4


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。