【入住請敲門4.專訪】MIRROR闖猛鬼酒店嚇死:一房都係嬰兒靈體

撰文:
最後更新日期:

ViuTV靈探節目《入住請敲門》拍至第三季,除兩位元老主持林婷、莫竣名之外,今次仲加入MIRROR成員盧瀚霆(Anson Lo)及邱士縉(Stanley)。出發前被花姐睇死會中招、老竇怕佢會帶啲唔乾淨嘢返屋企嘅Anson,結果不負眾望,開工第一晚就「被敲門」!

作為觀眾時,Anson同Stanley都曾經懷疑過節目的真假性。但做過主持後,兩位都對林婷同莫竣名佩服得五體投地。(葉志明攝)

同好多觀眾一樣,Anson同Stanley都曾經質疑《入住》嘅真假性,甚至喺開拍前特地向莫竣名求證。而Anson得到嘅回覆係:「佢好肯定話無造假,仲話總之有咩都唔好驚,因為so far都未試過害人……」就係咁,二人懷著興奮嘅心情,分別去到日本同台灣拍攝。結果Anson第一晚去到日本時,被安排入住四人房,並挑戰「都市傳說」。他說:「我將啲糖鋪滿晒喺張床,用意係招惹bb靈體,但呢個舉動我當晚開facebook live時無講。到我洗澡後,聽到露台係咁有咯咯聲,既唔係風聲又唔會係工作人員爬上嚟玩我,與此同時,見到好多網友留言話窗外有一班小朋友入去問我拎糖,又話已經有隻女鬼企咗係我旁邊,真係好驚。我仲懶醒將啲糖放喺枕頭,諗住就攝影機,後尾真係太驚又太淆底,將啲糖放晒落地先咁瞓。」

 

Anson開工第一晚就被敲門……

驚魂未定,大隊轉酒店後,Anson雖然獲安排同莫竣名同房,但並未有減少佢嘅心理陰影……「嗰晚我哋要喺房開長傘,因為咁會較易招惹靈體。準備瞓嘅時候,突然見到粒細藍光閃過,有諗過係攝影機,但機燈係黃色,粒藍光閃到第三次時真係好怯,突然間feel到有人篤咗我一下,但明明莫竣名瞓到死豬咁!當下都有諗過叫醒佢……」到底邊Anson被咩篤呢?相信連佢都解釋唔到,他表示或者係因為當時的心理狀況,令所有感觀都被放。「師傅有話普通級數嘅靈體其實唔會掂到人,如果掂到就真係好高level。」咁到底Anson係好彩定唔好彩?!

今次用EMF Meter實測係未真係咁猛鬼。

至於Stanley,佢話第一日喺台灣嘅靈探點開工時,不時都聽到有「節節聲」,直到工作人員打燈時,才發現牆角有近60多隻蝙蝠,當下嘅感覺係:「原來呢個節目係咁真實。」眾人之後繼續靈探,由於曾經有YouTuber喺同一地方使用「磁場探測機」得到回應, Stanley同莫竣名為此進行測試。「係有突然感覺到轉咗頻道,但呢個唔係最恐怖,最恐怖係問到有無發生過命案時,最入嗰個廁格突然有一聲巨響,好似係跌咗嘢咁,當下我哋第一個反應係衝出外面……」冷靜過後,Stanley同莫竣名再次進行女廁,當然係咩都見唔到,但手上嘅磁場探測機就不停發出沙沙聲……

Anson喺日本酒店巡房時,曾經聽到有女人喊聲,當佢敲門時,又聽到撞嘢聲。「但酒店話嗰層係無人入住……咁到底係咩聲呢?」(葉志明攝)

雖然整個拍攝過程都係驚同好驚,但Stanley同Anson都話如果有機會的話,都一定會參與,問到如果有得揀的話,想拉埋邊位MIRROR成員入局,兩位就突然非常認真咁考慮……Anson表示:「為求有好笑效果我應該會同Eden(呂爵安)去,因為佢真係咩都驚一餐,平時睇鬼片,真係要拉佢先肯入場。」至於Stanley就話會搵Tiger(邱傲然)。「因為好多時驚係受拍檔所影響,平時Tiger唔多講嘢,所以好想知到底佢驚嘅時候會係點。」

娛樂圈年度「最Sweet新聞」名單有喇!即到《01最賞睇娛樂大獎》投票,仲可以參加勁抽雙重獎,隨時贏得終極大獎旗艦手機11 Pro Max、Dyson風筒等。



請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。