【專訪】陳俞希由𡃁模變ViuTV一姐 唔怕公司偏心MIRROR:未驚過

撰文:
最後更新日期:

由王貽興、劉翁(Sunny)執導和編劇的ViuTV劇集《黑市》最近成為網民熱話,更有不少觀眾大讚各單元均能夠引起共鳴。今日(14/1),99台便會播放由陳俞希(Hailey)、黃奕晨主演的第14集《失眠夢》,讓大家感受失眠的恐怖之處。不過,原來陳俞希在現實生活中甚少經歷失眠,更能隨時隨地抱頭大睡:「其中一場戲我瞓喺張床上,要表現到好似發緊噩夢咁,貽興、Sunny出面嗌叫我畀反應,但係我完全聽唔到。到我起返身時,就問係咪要做返啲表情,『拍完咗喇』,因為我等埋位時真係極速瞓着咗。」更笑指之前拍攝真人騷《SE7EN》時,試過擔遮坐在海邊巨石上攤唞,結果「意外」睡着:「佢哋拍完晒走,竟然想唔叫我走!」

其實除了《黑市 – 失眠夢》之外,陳俞希最近亦有在《已讀不回》、《假設性無罪》演出,特別是她在《假》劇的「鵪鶉式」演出,深受觀眾讚賞:「以前有人問我鍾意做主持定演員多啲,我一定係話主持,而家試咗一兩套劇集,我真係對演戲有咗興趣,同埋挑戰性好似大啲,因為每一個角色都係唔同。」雖然不少人一早知道她在演藝學院畢業,但其實她並非主修戲劇表演,而是舞台管理,對於拍劇、拍戲,她無疑是初哥一名:「可能讀書時睇同學排戲都學到好多嘢,但真係拎起劇本真係入行先開始,我都有上戲劇班,但仲有好多嘢去摸索。」

點擊下圖觀看《黑市 – 失眠夢》花絮相片:

+5
+4
+3

自從ViuTV進入「後黃心美時代」,陳俞希頓變全公司資歷最深、出鏡率最高的「親生女」,是名副其實的「一姐」。提到這點,她即連聲否認:「冇啦,唔係啦!同事都係講笑咁講,我冇將佢當真。」談到現時她的出鏡率奇高,她說:「我唔夠擔咁說,我真係冇去計過,同埋我唔覺得係心美離開,而令自己多咗工作,兩者冇關係嘅。」

雖然已變「一姐」,但最近卻有消息指她「坐唔穩」,有報道便指ViuTV打算全力谷《造星》仔仔,放重資源在MIRROR、ERROR身上,向陳俞希、黃奕晨等「親生仔女」開刀。陳俞希坦言未驚過,一來合約未完,二來從未聽過這個消息:「同埋我同佢哋嘅路線係好唔一樣,MIRROR、ERROR係歌星,我就偏向係主持,一個大騷要有司儀同嘉賓先會成事。佢哋拍青春劇集,我拍就未必係呢類,人哋都未必想睇我拍青春劇啦!」又指《造星》仔仔的存在不會分薄其他「親生仔女」的資源。

點擊下圖觀看陳俞希專訪靚相:

+15
+14
+13

當然,無論有沒有其他人分薄資源,單單是在香港做藝人這件事也絕不容易,而入行十年的陳俞希亦坦言曾經有段時間完全沒有工作:「就係做𡃁模嗰陣,始終當時出第一本寫真集,係八個人一齊出,首先你要八個人之中突圍而出已經係一件難事,有時都會覺得,點解啲客唔揀自己,同埋真係會唔開心,會諗自己有咩做得唔夠好。」當時沒有底薪的她為了生計都有返兼職做電話問卷調查員:「因為我踏入社會之後,就冇問過屋企人拎錢,見到冇幾多錢淨,就嚟一百蚊都撳唔到,就會返多幾個鐘兼職。」

入行十年、已成ViuTV「一姐」的陳俞希坦言曾經有段時間完全沒有工作。(梁碧玲攝)

提到外界經常覺得ViuTV長期捱打,相信一班員工都想一吐烏氣,靠創新意念、製作去盡力爬頭,取代TVB業界龍頭地位,但陳俞希從來不認為取代TVB是ViuTV的任務:「我真心希望係可以百花齊放,好似我而家同BabyJohn合作緊,佢同時亦喺開電視拍節目,點解唔可以咁?以前劇場界都係咁啦,你可以做一個劇團,亦可以做另一個劇團。我唔介意喺大台出現,如果佢容許我嘅話。」因為這樣的話,所有藝人都能夠得到更多工作機會:「我成日覺得好嘥,可能佢拍其他台嘅節目都好適合,或者其他台嘅角色都好適合佢,但就係因為咁冇法子可以同時做,如果可以一齊做就最開心。」

點擊下圖觀看陳俞希Instagram靚相:

+26
+25
+24


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。