與高志森分手結束21年情 焦媛落淚表示:視佢為一世老師

撰文:
最後更新日期:

焦媛同高志森拍拖21年,除咗係戀人亦係工作伙伴,多年來合作創造出無數經典舞台劇,可惜呢段感情終要畫上句號。焦媛接受傳媒訪問時表示,已經同高志森分手一年多,結束長達21年嘅戀情。

焦媛高志森相戀21年。(微博:@焦媛實驗劇團)

訪問中焦媛提起同高志森嘅關係時不禁落淚,佢指二人分手不涉及第三者,強調工作伙伴關係不變,亦視高志森為一世嘅老師。分手主因係隨住年齡增長想法有所改變,焦媛呢一刻希望搵到個思想同步嘅人。

焦媛同高志森原來已經分手一段時間。(微博:@焦媛實驗劇團)

現年43歲嘅焦媛就讀香港演藝學院時,因參與學校音樂劇演出認識高志森,後更獲對方邀請組成劇團,其後二人墮入愛河,但當時高志森並未公開宣布已離婚,焦媛被指係第三者。焦媛早幾年接受訪問時剖白:「當時外界傳我係『小三』,其實我同高生一齊嘅時候,佢已經同前妻離咗婚,只不過佢無特別對外公布,當時我都無特別唔開心,因為我知道佢對我好就得。我覺得兩個人係最艱難嘅時候,反而感情係最好。」

焦媛指分手不影響佢地日後繼續做工作伙伴。(微博:@焦媛實驗劇團)

多年來佢地在公在私都密不可分,焦媛指高志森無論喺事業或愛情上都教識自己好多,不反對演出情慾戲之餘,仲鼓勵佢要去到盡:「我之前挑戰演大膽嘅情慾戲,其實都係佢鼓勵我去試吓,佢仲同我講『千祈唔好就住,要做就一定要做到最好』,令我更放膽去演繹。」早幾年曾多次傳出高志森諗住迎娶拍拖多年嘅焦媛,2012年高志森更講話「我出年四月有期,會同焦媛旅行結婚。」估唔到最終傳出嘅係分訊而唔係婚訊。

+10
+10
+10


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。