李國麟為同事發聲表不滿 急開記招拆彈:自己用錯咗方法

撰文:吳子生
出版:更新:

有「綠葉王」之稱的無綫男藝員李國麟(窿哥)早前接受《香港01》的「觸目配角」專訪,大談過去四十多年在無綫打拼的日子,亦對公司近年的製作及一年簽六個騷政策大表不滿,訪問出街後有極大的回響,有網民留言大鬧無綫冇良心,亦有網民鬧爆窿哥一竹竿打翻一船人,說話欠公道,反應兩極化。

【矚目配角】李國麟爆綠葉要去𢯎撈:有人叫我哋多啲去揾監製傾偈

【矚目配角】李國麟嘆TVB劇冇進步:如果離開咗,我都會鬧埋一份

今日(23/1)窿哥就此事開記招道歉,承認在專訪中忽略了其他人的感受:「喺個訪問中,自己當時就好似火山爆發咁,將咁多年積係心裏面嘅鬱結講咗出嚟,嗰陣時我淨係講一啲負面嘅嘢,冇講正能量嘅嘢,我覺得自己係唔啱,因為啲言論好影響一班好用心嘅製作人,我嘅言論係抹煞咗佢哋,其實我嘅出發點都係想反應畀公司知道而家有咩問題存在,我承認自己用錯咗方法。」

窿哥對自己之前一番言論影響到其他人心感抱歉。(葉志明攝)

提到擔唔擔心此事影響續約?窿哥直言:「如果呢件事影響到嘅話,自己都要檢討下,亦代表我喺市場上冇價值,佢哋要清楚知道我嘅出發點係為咗咩,如果我係踩公司,又冇養育之恩,呢個人就抵炒,我每次工作都好全心全意,我真係好愛呢間公司,如果佢哋覺得我在市場上,可用性不高唔用我,我都冇辦法。」問有否為言論感到後悔?窿哥坦言沒有後悔,但日後會在說話上更警惕,會深思熟慮後先講出口。