【On Call 36小時】馬國明入行11年終擔正未覺遲:男仔真係要磨練

撰文:陳芷穎
出版:更新:

TVB經典醫療劇《On Call 36小時》於深夜時段重播,馬國明在劇中飾演神經外科醫生張一健(一件頭),角色大受歡迎,他憑此劇於《萬千星輝頒獎典禮2012》奪得「我最喜愛的電視男角色」,更奪得大馬視帝寶座。

相隔8年,馬國明仍然非常感恩遇到很好的劇本,令他和同劇演員有發揮機會:「每一位演員都好鍾意個劇本,唔單只我同楊怡、連當時好新嘅演員,黃智雯、袁偉豪、羅仲謙都有好好嘅發揮機會,所以大家都好有動力,拍得好開心。劇本好多情節好感人,當時好萬眾一心咁去演。」

馬國明(馬明)-馬明是香港圈中出名的孝順仔,事事以家人為先,買樓是為了父母住得舒適,買車是為方便家人郊遊。拍拖的首要條件是要與家人相處融洽,即使婚後亦希望和家人同住。他更曾說過,長大後仍很喜歡挽著媽媽的手行街。(《On Call 36小時》劇照)

馬國明在無綫14期藝訓班畢業後,2000年加入TVB成為演員,初期飾演跑龍套角色,後來開始飾演配角或雙男主角劇集。直到入行第11個年頭,馬明才首次於《On Call 36小時》擔正做男主角,他並未覺得機會來得太遲,反而長時間的磨練令他為男一做好準備:「機會嚟到都要睇下你有冇能力handle,如果太早畀《On Call》我,我可能做得未必咁好。當時係一個適當時候,10年先出到一個小生,男仔真係要磨。女仔當然唔使,可能好靚已經可以做女主角,觀眾想睇俊男美女拍拖就OK,但有啲戲係要經驗累積先做到。所以我唔覺得遲,timing幾好,呢套劇令到觀眾覺得馬國明都識做戲。」

點撃睇馬明最深刻的一場戲:

+7

重提最難忘的一場戲,馬國明說是劇中細佬張一康(魏焌皓飾)意外身亡後,他在籃球場自責的一幕:「情緒去到好盡,導演想一take過,好有挑戰性。當時對手係楊怡,大家傾咗好耐令到好有情緒先拍嗰場戲,後尾完成咗,唔敢話自己超水準演出,不過OK喇。」

「一件頭」一角令馬國明之後在《白色強人》的演出更得心應手:「首先熟悉咗醫療劇,《On Call》一件頭同《白色強人》唐明係兩個層次,唐明比一件頭更加成熟,有咗《On Call》嘅經驗,無論係手術室戲、面對病人嘅感覺都好似做咗準備,呢兩個角色都係我演戲路上好難忘嘅經歷,多謝兩部劇嘅監製同編審畀機會我。」

點撃重溫馬明在《白色強人》的演出:

+2