【早霸王】女聽眾太心急表白 快過男方打俾森美獲讚:呢啲好女仔

撰文:
最後更新日期:

又有聽眾因交友apps而識到另一半。(影片截圖)

又有聽眾要求心儀對象喺《早霸王》表白,之不過,今集嘅「劇情」有少少反串同驚喜。女聽眾馮小姐表示因為呢排悶悶哋,於是開始玩交友apps,就係咁俾佢識到沈先生,仲約埋出嚟見面。「出嚟食飯有傾偈,因為自己比較感性而佢好理性,所以好多新觀點。」單憑呢一句,森美已經認定係有愛。

森美大讚女聽眾係好女仔,仲幫佢爭取被表白機會。

馮小姐表示第二次見面食飯後,二人一齊散步。「佢有問我開唔開心,我話開心之後,佢話咁不如一齊,嗰時太突然,唔知一齊係咩意思,一齊搭車定一齊食飯?所以無好直接咁回應佢,返屋企之後我有同佢講如果打去《早霸王》表白的話就當係真。」馮小姐表示對方自從收到order之後,開始表現得囉囉攣,又話對方比較內斂,要佢喺空氣電波中表白可能有一定難度。「但我叫佢有認真考慮過已經好感動,其實我都可以同佢講返(表白)。」

女聽眾太心急,未待心儀對象開口就已經表白。

聽到女聽眾肯反客為主,森美連聲大讚「好女仔」。電話接通後,一聽到係來至《早霸王》的電話,沈先生都已經大概明白係咩一回事,森美於是就問佢做咩唔做主動,並質疑佢係唔夠愛同玩玩下,仲話:「怕羞又走去識女仔?人哋女仔就唔怕嘅?」沈先生連聲否認,並指同朋友商量過之後,覺得自己講故仔平鋪直敘,加上唔想俾人知,所以遲遲未出手。森美決定接通雙方電話後,要由沈先生表白。或者係因為太心急,馮小姐一聽到沈先生把聲後,即時將心底話講出,雖然表白成功,但森美依然堅持要沈先生表白,並謂「唔好以為追到手就唔使負責」,最後,呢一集嘅「你知道唔知道有人掛住你」變成有兩次表白,真係好浪漫。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。