有線末代主播植詠珊入行前原來係空姐：每次派餐我都會嘔
撰文：秦志鴻
出版：更新：
自從2018年有線娛樂新聞取消主播制之後，仍然留守的主播就只有植詠珊（Cathy）及馬梓軒（William），早前二人就互相訪問，齊齊重遊成長地屯門分享童年回憶及工作點滴！Cathy入行前任職空姐，然而那份工只做了半年，她坦言：「當初想做空姐，係因為覺得佢哋好靚！但最後冇做，係因為我暈機浪！每次喺機上，差唔多到派餐我都會嘔！機上個個同事好忙，唔好諗住佢哋得閒幫你，你淨係可以衝入廁所嘔，嘔完出返嚟做嘢！」
Cathy入行後，外出採訪經常接觸名人明星，被問及哪一次採訪特別深刻，她笑言：「呢個問題我諗咗幾日，最後我覺得係訪問葛民輝嗰次！因為成個訪問佢不停整蠱我，更加冇諗過我同阿葛嘅搞笑互動會被剪出街，哈哈！」
至於William就對去年有幸訪問劉德華、古天樂尤其難忘：「我有時覺得做專訪就好似應付唔同程度嘅考試，而訪問兩位影帝，就好似考公開試一樣，因為兩位前輩氣場好勁！記得訪問期間，緊張到腦海有一刻空白咗，但空白得越耐就越驚，所以點都要諗到一條問題問落去，真係好考驗臨場應變能力！」