李忠希宣布再度離巢 入行22年感嘆:希望做啲真係想做嘅事

撰文:洪曉璇
出版:更新:

2020剛過一半,TVB已經有多位藝人陸續離巢,最新一位就有入行多年,曾與鄭中基陳奕迅同台奪得「叱咤樂壇生力軍男歌手」嘅李忠希,佢喺網上宣佈離開工作22年嘅TVB:「轉眼過了20個年頭。當中有苦亦有樂,世界在變,行頭在變,制度在變,公司也在變。」

李忠希於網上宣佈離開工作22年嘅TVB。(Facebook:JONES LEE 李忠希)

李忠希其實係歌手入行,1999年當時以李中希之名,憑《太著緊》專輯奪得「叱咤樂壇生力軍男歌手」銅獎,金獎同銀獎分別為鄭中基及陳奕迅。1999年佢加入TVB讀第13期藝員訓練班,2012年曾轉往港視發展,2年後再重返TVB。

李忠希當年仲係叫李中希時,曾經憑呢隻碟同鄭中基陳奕迅同台奪得「叱咤樂壇生力軍男歌手」。(IG:@jonesler)

接受《香港01》訪問時李忠希表示,其實早喺上年已經考慮向外闖:「做左咁多年,公司宜家制度同各方面都改變晒,咁啱又約滿就諗住自己仲年輕,不如出去闖下。上個月有劇傾左,自己最想向電影發展,都有同合作過電影公司同監製講已離開TVB,睇下有無合作機會。家人都相當支持呢個決定,唔係淨係得一份工,經濟上都唔會太擔心。」

李忠希喺TVB足足22年。(IG:@jonesler)

問到TVB有無挽留,李忠希指:「我喺度22年,唔計去港視兩年,返嚟後發展都唔係太突出,希望出去見下囉,做啲真係想做嘅事。(唔續約公司有無另開OFFER?)唔係唔續我,我無簽啫。(會唔會覺得鬱鬱不得志?)做左咁多年無呢D諗法啦,TVB都無承諾養一世,合約嘅嘢你情我願,TVB始終人多,年年咁多新人,合約唔啱咪唔續出去試下囉。其實都係暫別,依家有合拍部門可以搵出面演員,可能出年又會合作返呢,行頭係圓。」

李忠希最感恩係認識第13期藝訓班同學,到依家仲係好朋友。(IG:@TAVIA_YEUNG)
+10
你可能感興趣