【幕後玩家】真直男李豪拍劇專演hehe角色:驚畀公司定咗呢條路線

撰文:林通賢
出版:更新:
李豪在《幕後玩家》飾演偉仔,多穿粉色西裝,說話娘娘腔。

《幕後玩家》播放了一週,除了看劉佩玥和黃宗澤的肉搏場面外,心水清的網友,亦有留意到劇中Bosco的一位下屬偉仔,經常穿粉色西裝,青靚白淨得來又娘娘腔的李豪Leo。港男出身的他,在劇中姿態比女人更為女人,又常拿手機自拍好貪靚,其實李豪由於身型修長,膚色白,聲綫又陰聲細氣,所以經常演「乸型」角色,他說:「監製揾我都係因為個樣似女仔,講嘢又陰聲細氣,以前都成日做呢啲角色,太監、乸型啦,其實呢啲角色幾嘥energy,幾難做㗎,因為同現實嘅我兩回事,但冇辦法喇,我如果做得差又俾人話唔似,做得好啲人又話你係基,其實都幾茅盾㗎,但橫掂都做基,我就覺得不如基到盡啦。」為了可以「基盡」,李豪非常留意劇中一班女演員,他說:「我成日黐住班女藝員,問佢哋如果係咁,你哋會點做,點講?好多時都參考孫慧雪。」

李豪和蔡淇俊在《4 in Love》飾演夫婦,更要接吻,當時成為網友討論話題。

一Take過錫蔡淇俊:真係好大鑊㗎! 

雖然扮基扮乸入型入格,但李豪原來想突破這個框框,他說:「我都好驚自己畀公司定咗呢條路綫,我諗應該好快有人取代到我啩?頭幾次做,會覺得係挑戰啦,但做多咗就有啲悶,但公司安排到就一定拍,我會做好佢。其實依家都玩緊健身,想大隻啲,(大隻無得做乸型角色?)咁就最好啦!哈哈。」除了今次《幕後玩家》外,李豪深入網民心的角色全是乸乸地,尤其2012年特別多,《心戰》扮男妓Quincy色誘秋官,《東西宮略》飾演太監小六,但最令網民大讚的,是《4 in Love》同蔡淇俊扮夫婦,之後還要接吻,李豪自己都覺得這角色最難忘,他說:「絕對係錫蔡淇俊啦,錫嗰下真係好大鑊㗎,我完全冇辦法想像要錫落去,但監製(戚其義)在場,佢話為求真實感,不如真係錫落去啦,劇本只係寫錫面,我同阿俊又唔想阻人收工,就快啲拍,一take過,拍完都冇潄口,因為仲有嘢拍,之後都唔記得咗。」

李豪代表作為《愛‧回家》劇中飾演咖啡烹調師,同馬子妮(蔣家旻飾)演情侶,有不少網民追看。

除了乸型,同性戀角色,李豪最令人記得的是《愛‧回家》飾演咖啡師阿豪,劇中同馬子妮(蔣家旻飾),李豪亦覺得這是他的代表作,他說:「之前冇諗過會有條感情綫㗎,角色初頭只講我係喺咖啡店,唔知點解做做下越多戲,都幾開心。」可惜《愛。回家》之後,李豪又回到從前,角色發揮不多,他說:「唔開心係有少少,覺得有少少戲做喇,點知又做返啲無咩戲做嘅,不過等公司安排啦,我當係一個訓練。公司捧人睇時機,你急都冇辦法,唯有等囉。同埋我嗰樣咁後生,通常都係做人哋個仔,好少做到人哋男朋友,《愛‧回家》係好少數,你睇TVB啲劇有幾多係後生仔嘅愛情故事?」

 

李豪為07年香港先生,當時他17歲,其實他曾經man過。

李豪這種等機會不是消極地等,他一邊在無綫等機會,一邊是股票玩家,他說:「爸爸媽媽以前從事呢個行業,所以自細都識啲,試過輸幾廿萬,又試過嬴幾廿萬,以前唔夠經驗,試過開緊工,唔記得放而輸錢,就快深港通,可以留意下的煤炭呀,基建板塊咁啦。自己亦攪緊個美容品牌,希望下年可以推出啦。」李豪炒股幾十萬上落,原來不是乸型,是筍盤至真。