【無綫有寶】18歲小鮮肉吳偉豪 求演技進步:日日對鏡練戲幾個鐘

撰文:
最後更新日期:

吳偉豪在《八時入席》飾演祥仔侄仔,有不少對手戲,經常向這位前輩偷師。(網上圖片)

網友經常話TVB來來去去都是那幾位男女主角,好像青黃不接,但只要細心看,其實無綫都有不少有潛質的新人,尤其處境劇《八時入席》,除了十仔(馬貫東飾)、Elsa(簡淑兒飾)深得網友歡心外,劇中禾仔(吳偉豪飾),做King sir個孫,演技自然兼有鄰家男孩感覺,在無綫來說絕對罕有,不同《一屋老友記》彈起的張彥博,外表後生,實則36歲,吳偉豪今年只得18歲,名副其實的小鮮肉。

《八時入席》除了十仔(馬貫東飾)外,吳偉豪亦是出眾的新人。(網上圖片)

17歲入訓練班

吳偉豪上年17歲讀藝員訓練班,出來就拍《八時入席》,還要是連戲角色,不少人覺得他是靠家底及關係有此機會,但吳偉豪表示沒有,更很怕別人誤會他,他說:「好多人都問係咪靠家底,或者識邊個點解一出嚟就有角色做?如果我真係有,我出嚟即做主角啦,我知我起步比人幸運,好感激,但我係經過casting,監製試戲,我由細到大讀國際學校,一張白紙入嚟,一個人都唔識,高層更加唔識。」

吳偉豪稱得上小鮮肉,好動、大隻是基本的要素。(Instagram圖片)

預捱10年

吳偉豪父母為公務員,由細到大讀Island School,但因為好鍾意演戲,所以入TVB,他說:「我讀到中六,就報名參加藝訓班,我由細到大好鍾意梁朝偉和周星馳(吳偉豪WhatsApp圖像都是《國產零零柒》的周星馳),好想演戲,其實父母都想我完成中七先,但我真係好鍾意。佢哋依家都支持我。」

眾所周知,在無綫上位至少捱10年或以上,吳偉豪現贏在起跑線,但亦預了捱很多年,他說:「如果啲人做一兩年就紅,之後做主角,好似好難受到其他人尊重,但你見到祥哥(黎耀祥)、毛姐(毛舜筠)同國邦佢哋,人哋好respect佢哋,我諗要做咗10年以上先有呢個效果,我覺得係要捱㗎,捱出嚟嘅人唔同啲。」

吳偉豪同一眾《八時入席》演員關係融洽。(Instagram圖片)

日日對鏡練戲

吳偉豪外型和口音鬼鬼地,但做戲口音自然,亦沒有JM tone,全因他刻苦練習,他說:「因為由細到大返學講英文多,返到屋企就講廣東話,所以講嘢唔係好local,我記得有次田蕊妮嚟訓練班教我哋做戲,佢叫我哋要對住塊鏡練,我覺得好有用,所以每次攞到劇本,我都會對住塊鏡不停做,又會搵部機錄低再翻睇,都幾個鐘㗎,練到ok先停,唔敢懶,因為無做功課佢哋會睇到㗎,會好易瀨嘢。」轉投韓劇懷抱的,不妨有時間支持一下這位本土小鮮肉。記得是吳偉豪,而不是袁偉豪。

 



X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。