暖男爸爸專訪︱陳俞希入行十年靠「八婆」入屋:出街最多人咁叫我

撰文:邱愛霖
出版:更新:

ViuTV原創劇《暖男爸爸》緊接住《熟女強人》,甫出街就獲得觀眾一致好評,討論區更有網民瘋狂推文,除了領銜主演的鄭中基和張可頤,近日焦點落在喜劇擔當的陳俞希(Hailey)和強尼身上,兩人演技確有長進。他們在《暖男爸爸》出街前接受《香港01》專訪,談及出道多年辛酸史,Hailey淡然地說,她最默默無聞、最尷尬的時期已經過去,儘管已經對「無名」一事釋懷,但仍然希望透過《暖男爸爸》讓人記得她的名字,「我好想啲人記得我多啲。」
撰文:邱愛霖
攝影:梁碧玲
服裝提供:tout à coup(陳俞希)、O.N.S(強尼)
化妝:Sara Wong
髮型:Jeff Wu

強尼和Hailey均以主持形象入屋,拍戲經驗不多,Hailey尤其對拍喜劇大感緊張。(梁碧玲 攝)

主持過檔轉型做演員

也許觀眾較少欣賞到Hailey和強尼做戲,但對二人的主持形象卻不陌生。強尼從有線球彩台兼職講波佬,到如今在ViuTV主持《全民造星》等頂級節目,主持功力有目共睹。至於Hailey則是水着模特出身,近年在《晚吹 — 空肚講宵夜》被另一Mean爆主持梁祖堯笑稱為「八婆」,更令她「八婆」一稱成為節目icon之一。

雖然Hailey和強尼對住人群毫不怯場,但他們在演戲方面無疑是新手級別。尤其Hailey對首次拍喜劇大感忐忑不安,「我嘅緊張係在於:『死啦,要做喜劇喎……』因為我成日都覺得喜劇係仲難做過正劇。導演係拍嘅時候仲話:『啲dramatic、開心啲嘅位,靠哂你哋啦!』」

專訪│演藝事業源於足球場 強尼感激父親傳授基本功:睇嘢闊咗!

強尼大讚好友鄭中基拍戲「鬆緊自如」,Hailey認為張可頤平易近人。(梁碧玲 攝)

強尼讚鄭中基拍戲夠「鬆」 Hailey與張可頤合作超放心

既然要拍喜劇,強尼和Hailey有否請教過喜劇出身的鄭中基?強尼認為輕鬆戲不難,反而最難是正經戲,但幸好鄭中基輕鬆自若的態度性情有助推動現場氣氛,強尼形容為:「鬆」,「Ronald係一個好『鬆』嘅人,佢嚟到現場就好『鬆』㗎啦!但係佢平時咁『鬆』,你睇佢咁多喜劇,但佢一收落嚟,同你做情感上嘅交流對白,嗰個佢你平時少見,而佢一畀啲情感出嚟,現場嗰種推動力就好強啦!」

至於Hailey,因為第一次與無綫視后張可頤合作而相當緊張,但後來她發現張可頤相當平易近人。張可頤在拍劇期間不但幫Hailey現場整理頭髮,在排戲期間更主動叫Hailey大膽推撞她,起初她相當畏縮,「劇本入面,我同Maggie在公在私都會好多嘢傾,我哋要做到好熟絡嘅感覺。所以我同Maggie排戲嘅時候佢就會:『其實呢個位你可以咁做呀!嗱,你推開我啦!』咁開頭你會驚㗎嘛,你第一次同大人物合作,推開張可頤,你會:『吓?』但之後你會覺得好放心囉!」

強尼拍《暖男爸爸》時絲毫不感緊張,Hailey則對要拍喜劇感不安。(影片截圖)

Hailey與張可頤,以及強尼和鄭中基:

+1

被稱「八婆」或叫唔出名都唔覺尷尬

ViuTV不似無綫,沒有提供藝員訓練班,自創劇產出亦不多,想行演員之路的ViuTV藝員亦只可從主持做起,久久才有一個磨練演技的機會。縱然Hailey在黃心美離巢後,成為ViuTV知名度最高的其中一位花旦,更被外界冠以「ViuTV一姐」之稱,不過她似乎以《空肚講宵夜》中的「八婆」主持形象更為入屋,「出街最多人係叫我八婆。最初我媽好反感,但到最近我同佢既一次交流係,連我媽都話,『你都係八婆嚟㗎啦!』」有次Hailey在街上幾乎撞到一位婆婆,被她指罵「八婆」,Hailey笑言:「冇嘢呀!我都成日畀人咁叫㗎啦!」

縱使以「八婆」入屋,但最尷尬的地方是,不少觀眾僅認得「ViuTV一姐」的樣貌,但始終叫不出名字,這也是許多ViuTV藝員面對的的窘境,Hailey會否對此耿耿於懷?「你話會唔會尷尬,我又真係冇乜咁嘅感覺。老實咁講,以前拍寫真嘅時候的確有遇過,好多時候記者就會係:『阿邊個邊個,做訪問啦!』以前細個嗰陣就會諗:點解成日都唔叫我哋嘅?點解都唔叫我哋做下㗎?因為有啲時候唔可能叫曬8個一齊做,可能真係叫一、兩個,咁佢次次都係叫嗰啲人。有時候唔開心嘅係,嗰陣佢好好,接咗某啲角色,但係佢成日遲到、表現得唔好……我嗰陣時成日都諗:點解我做得好嘅時候,人哋都唔會叫我做(訪問)嘅?」

縱使已經對「無名」一事慢慢釋懷,但Hailey依然希望觀眾「記得我多啲。」(影片截圖)

Hailey:我好想啲人記得我多啲

最黑暗的時刻,也是成長得最迅速的時期。這些難受的經歷反而令Hailey學識接受娛樂圈規則,漸漸地,她在不知不覺間已經對「無名」一事慢慢釋懷,「即係以前我嗰個moment,你要諗嘅時候,係嗰幾年已經發生所有你覺得已經最…(肉酸?)係呀!即係你以前會咁諗,後尾我開始慢慢接受咗個流程,佢哋訪問,佢一定唔會問你㗎啦!原來個娛樂圈係咁行嘅,有話題性,咁咪問囉!咁你咪安慰自己,唔係因為你未努力,係因為個機會未到囉!都經歷咗差唔多十年、八年啦,咁長嘅時間,咁依家就真係冇呢個感覺。」

釋懷是一回事,但若是認真對待演藝事業的藝人,當然會想努力脫離「認得樣叫唔出名」的階段,讓觀眾記得她不只是「八婆」,也是「陳俞希」,「我好想啲人記得我多啲,想多啲人幾得我哋條綫好睇。」

強尼不介意網民鬧爆,坦言最想《暖男爸爸》有討論度。(影片截圖)

強尼「佛系」拍劇:呢套劇有人睇就得㗎啦!

既然想觀眾留下深刻印象,不如考慮發展成「熒幕情侶」?本來只是記者的玩笑話,然而強尼卻認真回答:「其實你估唔到依家呢個時勢嘅走向。我第一年做《全民造星》,我做頭幾集,啲人係恥笑,係用恥笑呢個眼光去睇呢個節目。決賽之前,佢哋十條友去咗皇室堡,企滿4層樓。我就了解咗一件事係:當初你哋唔係笑㗎咩?我參與個節目,我都係其中一份子,我就知,原來係冇得計!我諗我哋成個製作團隊都冇諗住係咁。譬如劇集,你諗住有套劇:呢套係啦喎!(點知)冇事發生過。嗱,真心,我覺得舊年既《Me Too》(假設性無罪)幾好,但冇乜人談論過。」

因為已經放下計算,強尼反而不介意網民鬧爆《暖男爸爸》,有討論度已經心滿意足,「好同唔好都係一個討論度,有人鍾意我哋呢套劇係bonus。我拍咗幾套劇咋嘛!如果你認為咁叫好,自己都覺得有啲離譜啦!」

雖然強尼和Hailey回望舊作《已讀不回》時都會尷尬對望,笑著歎氣:「唉呀!」但強尼對《暖男爸爸》要求不多:「嗰一刻我哋做《已讀不回》,起碼都覺得自己盡咗最大努力。其實最想呢套劇有人睇就得㗎啦!」《暖男爸爸》至今播到一半,反應不俗,坊間一片叫好,相信當初強尼對劇集的期許已經實現了吧。

點擊看強尼和陳俞希更多靚相:

+9

點擊看《暖男爸爸》更多劇照:

+1
你可能感興趣