湯洛雯回應與黃心穎互相取消關注：唔記得對上一次聯絡係幾時
撰文：洪曉璇
出版：更新：
湯洛雯呢日現身名錶活動，一向投資眼光獨到嘅佢，去年底榮升業主，以約4000萬元購入馬鞍山逾2,000呎別墅單位，對名錶都好有興趣：「第一隻名錶係大學畢業時媽媽送贈，自己都會慢慢留意下，實用經典又保值為主，好似呢隻可以防水啱晒我，因為我好鍾意潛水。」
湯洛雯呢日出席名錶活動。（梁碧玲攝）
靚湯正在拍攝《金宵大廈2》，嚟緊聖誕比較有空，但男友馬國明拍完《兒科醫生》緊接就要入《白色強人2》劇組：「有時間經過都會探班，情侶錶做聖誕禮物都ok，呢個年代都無話一定要男仔送禮，女仔送都無問題呀。」
最近湯洛雯忙於拍攝《金宵大廈2》。（梁碧玲攝）
最近被發現同昔日好姐妹黃心穎已互相Unfollow，靚湯就話自己無做過任何動作：「其實我無Unfollow佢呀，咩動作都無做過，通常Follow咗一個人唔會再理，友誼都唔係建基於Instagram 互動，大家都仲係朋友，不過佢去美國之後已經無咩聯絡，唔記得對上一次聯絡係幾時啦。」