【致命復活】陳庭欣飛越南「一秒被姦」 扮死屍烏繩摟：有俾嘢咬
撰文：郭敏玲
出版：更新：
一見到呢個畫面，心知不妙。
台慶劇《致命復活》昨晚出街，第一集就見到飾演郭晉安下屬的陳庭欣「一秒被姦」，然後就命喪越南。這一幕事後引起很大迴響，陳庭欣表示沒想到大家會關注，「我之後收到好多message，甚至我契女見到，以為我真係死咗，睇到喊晒，問佢媽媽係咪以後見唔到我！」陳庭欣在第一集就被殺，之後又會唔會見到佢呢？她說：「其實呢場戲除咗我死，就無交代其他嘢，之後都會講下我同郭晉安嘅關係，提到我點樣幫佢，又會講我同朱晨麗嘅關係，多多少少都會有我嘅片段。」
陳庭欣在《致命復活》第一集慘死之後，她表示有很多朋友傳信息關心她。（陳庭欣instagram）
陳庭欣拍這場戲躺在草堆上，感覺到蟲咬她。
雖然陳庭欣被姦到死去只得數秒，她坦言比想像中死得快，或許虐殺鏡頭因尺度問題，難以見街，但拍攝過程並不輕鬆，首先要遠赴越南，經過一番舟車勞頓，「去到越南，之後要坐七個鐘頭車，仲未完要再坐船，過程好漫長。」搭車又搭船，拍的時候要死在荒野，陳庭欣笑言當時驚有蛇，「我要瞓喺堆草上面，好原始的感覺，背脊都覺得拮拮哋，我仲feel到好似畀嘢咬。」聽落都覺得痕，陳庭欣反而話唔敢講辛苦，「我去越南只係拍呢場戲，對比起其他演員，佢哋仲辛苦，要拍好多場戲。」
就係呢隻烏繩（紅圈），令成件事更逼真，陳庭欣真係好似死咗有段時間咁。
陳庭欣第一次拍強姦戲，又驚唔驚拍開有條路？她就不擔心，「始終咩都要試下，都無諗過今次大家有咁大反應。」她表示自己死得逼真，除了要多謝監製安排、劇組人員的協助及化妝師的技術，還要多謝期間飛過的烏繩，「我成身都滴滿血漿，都幾真實，不過隻烏繩飛過，個效果仲好，真係好似死咗好耐咁。」嘩，即刻隔住個熒幕都覺得有陣味......
今次咁爆，陳庭欣將來會有更爆的演出，她正在拍攝另一套劇《踩過界》，飾演一名變性人，仲要係由男變女。做男仔的部分，身材向來唔錯的她，為求更似男仔，紮胸兼近乎素顏，對她來說甚具挑戰性。