踩過界2│監製林志華專訪:識做戲嘅演員只會問一個問題

撰文:
最後更新日期:

《踩過界II》為今年無綫台慶劇,在香港同內地口碑非常不錯。(資料圖片)

《踩過界II》《反黑路人甲》監製林志華在無綫工作了三十年,自言繼續工作的其中一個原因是「多嘢講」他說:「我好鍾意講嘢,我喺中大讀Science,對住隻死老鼠都有嘢講,點解你條血管係咁呢?做呢行有個特質,就係好鍾意將自己諗到嘅嘢講俾人聽。」

不單止「講嘢」,林志華亦鍾意「睇嘢」,美劇他追得貼,但強調要看得「精」,他說:「成日同啲導演講,睇劇同女人化妝一樣,less is more,睇最好嘅、吸收佢,亦睇最衰嘅,唔好學佢;睇得太多影響自己決擇。」

做監製要想「講」識「睇」,至於演員,林志華覺得最重要是懂得「問」:「一個演員識唔識做戲,其實睇佢問咩問題就知,佢唔係問我呢套劇我有幾多對白、對手邊個?我佔幾多場戲?而係問我點解呢個角色咁講嘢嘅?佢成長背景係乜?佢係問點演繹角色,如果佢識得問關於演戲嘅問題,呢個演員唔會差得去邊。」

監製林志華表示自己睇美劇多數在車上,他說:「太太去shopping成個鐘,我喺架車有乜咩做啫?咪就係睇劇囉。」。(林迅景攝)

港劇要有自己特色 要放低『攀附』

手機煲劇的年代,觀眾很容易將TVB劇與美劇、韓劇、內地劇比較,監製林志華明白觀眾殘酷,但他覺得創作人要放得開,人家一些獨有資源,恨來沒用,受歡迎的題材,硬套落港劇亦不適合,他說:「兩個詞語『比較』同『攀附』係要擺低,你攞自己古裝劇同內地比較,內地人由細到大浸淫住呢啲文化,生活喺呢啲山山水水入面,就算講出嚟嘅對白文縐縐,都係佢哋先得,我地講出嚟會打冷震,呢啲唔係我哋嘅特色亦係人家嘅強項,或者你攞美劇比較,人哋美劇《24》周街都係特務,佢拍你會信喎,但你話如果故事背景係香港,觀眾未必投入喎,港劇發揮返自己嘅特色,其實全世界都想睇人哋國家嘅文化同特色,你拍到自己嘅特色就會有市場。」

《反黑路人甲》亦是林志華監製作品,絶對是TVB其中一套破格的劇集(劇照)

「比較」只會令人疲累

訪問中林志華多次強調要放低比較,就算《踩過界》兩輯,他覺得最重要是超越自己,他說:「無論我哋生活或工作上,都因為「比較、呢個詞語,令自己過得唔開心,以自己個女,游水做例子,我哋同小朋友講,每一次攞到自己嘅最佳成績,咁就得架喇,唔需要同隔離比較,點解要參加比賽,就係定個目標俾自己去完成,正如,我哋開新一輯《踩過界》就係諗點樣拍好佢,上一輯唔係用嚟比較,只不過用嚟參考,用嚟累積一啲經驗,令《踩過界II》做得更好,就唔係我地要好過第一輯。」

2016年《EU超時任務》令王浩信、朱千雪人氣急升,雖然最終沒有得到〈最佳劇集〉這個獎頂,不過成為網民心目中神劇之一。

經常比較容易產生妒忌,亦可能出現一個迷思,覺得無限資源就可以製造驚世神劇,但林志華覺得資源是另一個問題,但首先要發揮特色:「相對外國我哋呢一刻未有最充足嘅資源,但我哋有自己嘅特色,唔一定要諗,我一定要拍到《Emily in Paris》,我有錢去法國拍外景就一定拍到,我可以話你聽唔係囉,就好似《踩過界II》一樣,我套劇冇飛天遁地嘅大場面,有嘅係一啲法庭案件點樣做到引人入性,令觀眾共鳴,我諗呢個先係觀眾鍾意嘅原因,正如我地嘅港式奶茶,第二到係飲唔到。」

林志華很感激秦沛在《踩過界II》加盟,他說:「開拍前Paul哥已經睇哂第一輯,佢係令成個劇,台前幕後有提升,有時我哋甩咗嘅地方,佢會提點返,佢嘅貢獻唔單止係演出。」

王浩信係現實版張細倫

每一個監製都有自己的班底,喜歡的演員,林志華近年作品必有王浩信,直接問他:「點解你咁愛王浩信?林志華說:「我同佢之間係無愛架,機緣巧合啫,王浩信佢有樣好,就係好主動,譬如《飛虎》,佢本身書生身型,但突然間就好大隻,好珍惜呢個演出機會,有啲演員叫佢做飛虎,但成身肥肉,到《EU超時任務》,我自己覺得渠頭呢個角色唔難做啦,王浩信主動同我講,『不如入去圍村住兩個禮拜啦。』雖然最後冇,但我都同佢入過去圍村,佢又會叫啲圍村人教佢點講嘢,佢真係好鍾意演戲,舊年佢開《踩過界II》之前,佢去咗美國幾個月讀演戲,佢係好鍾意投入演戲嘅世界,你地睇返《反黑路人甲》其實嗰個就係王浩信自己嚟」我數過,林監製用了8分10秒讚王浩信,一定無愛啦,但一定好欣賞。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。