全民造星III︱李靜蓮Alina擲6位數積蓄追夢:錢可以之後再搵番!

撰文:
最後更新日期:

ViuTV選秀真人騷《全民造星III》於上月26日結束,無論是節目播出期間以至決賽表演時多麼技驚四座,面對疫情下娛樂圈半停擺狀態,所有參賽者也要回歸一邊等運到一邊食穀種的「日常」,就算打入十強、又睇得又跳得的李靜蓮(Alina)也同樣如此。「其實『二十進十』嗰時已經好驚,當一刻已經唔係諗緊比賽嘅輸贏,而係諗之後會係點,真係唔想個比賽完,好驚又要返番現實,又要等工作、等機會。」

撰文:陳栢宇

攝影:梁碧玲

服裝提供:D-mop

談起自己未能在《造星III》贏三甲殊榮,Alina認為絕對是能力問題:「唱歌又唔係好,跳舞又唔算最勁,冠軍Ben(趙祥誠)跳舞係Extreme地勁,亞軍陳葦璇係超勤力,我永遠唔夠佢勤力,季軍ANSONBEAN(陳毅燊)就好Charm,天生就好Charm。」

入行4年的Alina雖然拍過ViuTV《黑市》、無綫(TVB)《宮心計2深宮計》,但演藝作品始終屈指可數,每年僅得一至兩套劇集、節目出街,令她一度懷疑過自己是否仍屬「表演者」身份,幸而《全民造星III》令她重新返回軌道,但過程中又擔心比賽後再次打回原形:「好在喺比賽之後有導演、製片打嚟問我有冇興趣去Casting,其實我一直都想行演員呢條路,只係咁耐都未有Connection。」

徘徊在演藝上的公路三岔口,Alina並非沒有想過轉軚駛入其他領域,完全放棄幕前工作:「大家都知呢行搵到幾多錢,係好難捱,好似每一刻都諗緊要放棄咁。(邊一刻最想走?)望住Stanley(MIRROR成員、男友邱士縉)好好嗰陣時,其實唔算好難受嘅,而係會問『點解我遇唔到呢啲咁好嘅機會?』,但係而家諗番起拎男朋友同自己比好戇居。」

Alina明顯因《全民造星III》變得「入屋」,專訪當日有不少小粉絲上前求合照。

堅持每月畀一萬蚊家用

口講難捱,但最終都算撐得過,Alina不是因為憑夢想、意志力,而是做副業賺外快:「搵食一定唔係靠做演藝呢行,我自己都有小生意,同埋會Keep住周圍飛去做一啲跳舞Event,叫做可以滿足自己之餘又搵到錢。(畀到家用?)呢個係我對自己嘅最低要求,屋企唔使我畀好多,都係一萬蚊左右,點都畀,都養到我咁大。」可能是Alina的父母在她只得4、5歲時便已經分開,加上媽媽後來陪弟弟去外國讀書,令她中一、二時已經開始學識獨立,意識到不但不能為他人帶來麻煩,對自己也要有一定要求:「雖然我係跟公公婆婆住,但係基本上所有嘢都自己搞掂。」

點擊下圖觀看Alina專訪表情包:

+10
+10
+10

沒有跳舞底子 將勤補拙

對自己要求高,面對挫折時,會跌得更傷、更難受。Alina因為中四時修讀了演藝學院(APA)的Part-time課程,接觸了舞蹈,中五會考後索性考APA,後來獲得錄取,主修現代舞。「不過嚴格嚟講,我係冇舞蹈底,所以入到去係好辛苦,死頂囉,尤其係芭蕾舞對我嚟講係最難,因為我天生手腳唔協調。」

沒比較便沒有傷害,Alina同班同學幾乎個個都有舞功底子,反觀自己完全不懂,所以每當上完芭蕾舞課一出門口便崩潰爆喊:「老師係好傳統嗰種,即係如果你跳得最差,你就要企第三行,咁我永遠上堂都係第三行,因為我真係好新。好記得有一次老師話:『你呢個動作可以做好啲』,我喊到收唔到聲,『點解我做唔到?』。」

不甘心,就要將勤補拙,所以Alina去了補習,沒錯,跳舞都有補習,每晚7點放學後,她都會到外面的Studio再接受訓練,如是者三年便過去了,舞技確實大有進步,但心內的結卻是愈來愈緊:「學校係有心理醫生,Year 3時睇咗足足一年,Check咗係抑鬱。醫生話要靠自己,之後就唔知係唔係因為公公過咗身,跟住就覺得其實其他嘢都冇咩所謂,好似睇通咗、成個人都輕咗。」心寬,路便會走得遠,就連系主任都察覺Alina大有進步,不過當刻她已經不像往日如此在意他人想法:「個人是但咗,原本真係Aim First Hon畢業,臨尾都是但埋,過到Attendance就OK。」

Alina在陽光下翩翩起舞,怎會想到當年的她是「手腳不協調」:

+18
+18
+18

曾遞表參選港姐

畢業後,Alina做過3、4年全職舞蹈員,隨「左麟右李」團隊東奔西走。然後,她在25歲時突然想起將來的路:「當時Sunny Wong叫我跳埋郭富城先決定再唔再做Dancer,但我覺得去到25歲,如果再唔離開,之後就會唔敢離開,所以我就拒絕咗,然後就去參與《美選D.n.A》。」原來Alina在正式參加《美選D.n.A》前曾經遞表參選港姐,提名人更是「校長」譚詠麟,可是最後連面試的機會也沒有:「總之就係冇揀到我,可能係我最後一刻先報,當時我仲諗緊去邊度好,結果個天幫我決定咗。」

Alina在2016年曾參加ViuTV選美真人騷《美選D.n.A》,可惜最後八強止步。(ViuTV)

花盡6位數積蓄參加《造星III》:開心就好!

Alina承認,曾天真的以為參加完《美選D.n.A》後可以Job接Job,當然各位讀者都知道事與願違:「不過現實就冇打沉我嘅,條路自己揀,係自己想出嚟自由身再闖盪下先,所以臨尾冇簽ViuTV份約。」然後輾轉4年,期間曾經簽過一間經理人公司,完約後回復自由身,並重返ViuTV,將多年死慳死抵得來的6位數字積蓄,投資參加《全民造星III》:「玩《造星》真係傾家蕩產,衫全部都係自己準備,決賽件紅色戰衣度身訂做要成一萬蚊,仲有搭的士錢,我住坪洲,坐完船唔係由中環飛去荃灣西Studio就係去九龍灣ViuTV,每程都要200蚊。追夢真係使好多錢,當初都冇諗過咁多,而家真係重新儲過,開心就好,錢可以之後再搵番。(Stanley有冇資助?)叫佢幫手買啲嘢,佢冇問番我拎錢,哈哈!」

Alina決賽戰衣非常性感,她坦言有問過Stanley意見:「不過只係設計上OK唔OK,唔係問佢我可唔可以着得(咁性感),不過佢都係Dancer,佢一定明跳舞係要着啲郁得嘅衫,如果換轉係着好靚嘅裙,郁動就細。」

「大表哥」全力支持女友追夢

《全民造星III》比賽初期,拍拖近4年的Stanley仍身在台灣拍攝新劇《塵沙惑》,只能隔空遙距支持Alina,到回港出關後,才全力支持女友追夢,Alina講起對方貼心舉動時不禁甜笑:「佢返香港之後,我就感受到有Assistant嘅美好,最誇張嗰次係,A組『戰狼11』(A組的別稱)最後一次開會,突然間有人話好想食蘋果批,佢住馬鞍山,我就問佢可唔可以銅鑼灣買蘋果批畀我哋(食),然後佢就買完之後去荃灣西,變咗外賣速遞員。」

點擊下圖觀看Alina的IG靚相(內含大表哥與大表嫂放閃圖):

+20
+20
+20

除了「大表哥與大表嫂」之戀,不少人都記得Alina曾與胡定欣前男友、音樂人陳明道(Terry)傳緋聞,不過Alina便斬釘截鐵指自己僅視對方是父親、師傅:「我同Terry冇拍拖啦!所以第一次聽到時係『吓』,然後再傳就係有少少無奈,最近這段新聞再被翻炒我都有主動同Stanley講,大家都覺得Bad news都係Good news。(因為娛樂圈係咁運作?)係,所以之後嘅路,我唔係話想行得順暢,而係想多啲嘢嚟,就算係唔順,我都想要,因為要跌過先識爬起身。」



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Microsoft Edge 或 Safari。為避免使用網頁時發生問題,請確保你的網頁瀏覽器已更新至最新版本。