【一索得男】蘇永康唔想阿仔似梁游:「可反叛,但要識分莊閒!」

撰文:張浩恩
出版:更新:
蘇永康日前到電視城錄影節目《我愛香港》時仍未爆出喜訊,但他一臉風騷,難掩將為人父的喜悅。(符祥定攝)

恭喜49歲的蘇永康即將榮升做爸爸!前年12月與任職Alexander McQueen亞太區主席馮翠珊(Anita)結婚的蘇永康,今日透過電話錄音承認一索得男,太太目前懷孕約五個月。其實阿公前年結婚後已經打算全力造人,更特別向老闆任賢齊(小齊)請假一年實行造人大計,不過世事嘅嘢真係好難預計:「當時我去咗杜拜、意大利、威尼斯,希望戲劇性地營造啲浪漫氣氛去令到佢有啦,點知都係冇。」

阿公在浪漫氣氛下造人失敗,卻在五個月前收到上天送給他的禮物,讓他大為驚喜。而為免BB小器,阿公依照中國傳統習俗,待BB三個月時才向Big Four及男人幫等身邊好友報喜。他透露太太目前狀態良好,但近日開始嘔吐不適:「佢開頭幾個月佗得幾舒服,但依家食完早餐就會嘔,我會幫佢掃風,盡吓做老公嘅責任。」

蘇永康與太太結婚後曾全力造人,可惜無功而回。(東星圖片)

作為高齡爸爸,蘇永康不緊張就假,所以他亦有向小齊及家強等好友請教湊仔心得。問到會否想囝囝遺傳其音樂細胞,阿公說:「其實我冇咩望嘅,淨係一樣嘢,就係唔想個仔似我,想佢似阿媽,起碼好樣啲!音樂同時裝呢啲元素我相信佢一定會遺傳到,將來佢學唔學到就睇佢啦,因為佢將來長大嘅世界都唔知係點。」

唔想多多個梁頌恆、游蕙禎:要識得分莊閒

至於對囝囝的期望,阿公希望他舉止有禮:「嗰日影到我約拉姑出嚟傾偈,係想請教佢,其實霆鋒咁反叛,你點將佢教到咁有禮貌,霆鋒就算係十幾歲最反叛嗰陣,佢見到所有前輩都會鞠躬。」他更謂不想囝囝將來做第二個梁頌恆或游蕙禎破壞社會安寧:「我必須要做嘅就係唔好為社會製造多一個造反嘅人,簡單嚟講我唔想生一個梁天(頌)恆,我唔想生一個游蕙禎。我要佢識得分莊、閒,你可以反叛,但唔可以做一啲背祖忘宗、分裂國家嘅事,絕對不能,如果佢做出呢啲事,我係會親手懲戒佢。」

蘇永康透露太太預產期是明年4月。(黃國立攝)