李香琴出殯︱大姐明最懷念一同穿泳衣做亞視騷:好佩服佢敬業樂業

撰文:關穎賢
出版:更新:

資深藝人李香琴於周一(4/1)因病逝世,終年88歲。昨日(25/1)於紅磡世界殯儀館設靈,圈中多位藝人都送上花牌及到場送琴姐最後一程。大殮儀式於今早舉行,跟琴姐早有淵源的「大姐明」林建明亦早早到場。

「大姐明」林建明一早到場送別琴姐(陳順禎攝)

大姐明跟老公曾展章一同接受訪問時,透露自己跟琴姐相處冇大冇細,更以花名稱呼大家:「我叫佢Piano,佢聽到就會卡卡笑,好開心好玩得。唔會好似啲長輩稱呼我阿明 ,叫我大姐明,成日一齊玩一齊食飯。」她續指印象最深刻的就是,在亞視跟琴姐一起穿上泳衣做騷和在《歡樂今宵》一同演出:「個個都興爆肚爆陰毒,有次佢就陰毒得緊要,喺心口黐咗執毛。好佩服佢敬業樂業,人又好,好懷念佢。依家都係笑喪,希望佢喺另一度快快樂樂。」

永遠懷念帶給香港人歡樂的琴姐(陳順禎攝)

大姐明表示早兩年曾探望琴姐,當時她已經不能再工作,需要留在家中休息,哽咽說:「開始慢慢唔係好記得人,當時我希望喚起佢多啲回憶,問佢記唔記得歌詞,即場同佢唱粵曲。之後過咗一段時間,朋友話一齊去探佢,但就話佢依家完全唔記得。呢剎那我就比較傷感啲,好好哋突然又唔記得你。」問到還有甚麼話想跟琴姐說,大姐明謂:「佢依家無憂無慮,希望佢遇返啲老友記,炳哥肥姐,一班老友打麻雀去玩。」