【致命復活】演衰細佬搶鏡　黃嘉樂憶忘父哽咽：都未有乜嘢成績！

無綫熱播中的台慶劇《致命復活》，全城競猜誰是Final Boss，今個星期講到謝雪心一家，劇中王浩信兄弟不和，而他細佬康成賢經常藐爆大哥，處處留難，句句有骨，角色被網民鬧到狗血淋頭，只得一個人沾沾自喜，他就是飾演成賢的黃嘉樂，他表示：「連我都想煎巴自己。」

黃嘉樂對於這個乞人憎的賤格細佬角色，不但毫不介意，而且相當受落，皆因越多人鬧，代表越多人留意，對於入行13年的他，反而是一次上位機會。「呢個角色真係好衰呀嘛，由頭衰到尾，而且不知悔改，見到討論區嘅留言真係好多人鬧。」黃嘉樂俾網民鬧還笑騎騎咁犯賤？當然不是啦，他也有自己的苦衷，只怪自己樣子生得太正氣、太斯文。

「入行早期俾我嘅角色，通通都係做人細佬，而且都係好乖，有啲懦弱，有時角色性格都唔知點咁，即係冇性格，依家做衰人性格反而鮮明突出，就算戲份唔多都有人留意到，網民越鬧我越開心。」黃嘉樂笑着說。天生Baby Face的他，不說不知，在《致命復活》中雖然飾演王浩信細佬，但他真實年齡其實比對方大5年，他說以前其實相當抗拒自己生得年輕，侷限了角色發揮。

黃嘉樂是家中長子，胞弟以前會笑他「你睇落似細佬」，但現在他卻懂得利用這個優勢，「生得後生，個人襟老，變相咪襟撈囉，我其實同鄭世豪同期，就知我仍堅持啦。」但嘉樂也說自己輸在心態，入行時不如其他人拼搏，目標清晰，「當時到TVB維修電話系統，有人問我有冇興趣入行，咪諗住試下囉，入到去先知原來班同學鬥心好強，自己心態輸蝕咗，到咁上下時間，先發現自己真係鍾意演戲，惟有再加把勁。」

說他懷才不遇，但黃嘉樂曾到內地發展，更在內地電視劇《媽祖》擔任男一，他表示：「其實藝訓班出來之後，公司都俾咗好多機會我，只係自己把握得唔好，所以唔會怨天尤人。早幾年爸爸身體唔好，所以返嚟發展，多啲時間照顧佢，而爸爸佢去年已經過咗身，我家庭唔係太富裕，但入行時家人都好支持，我同爸爸講話「想做藝人，但搵唔到乜嘢錢。」爸爸同我講「唔緊要，你去試吓啦」，想不到爸爸過身時，我都未有乜嘢成績。」黃嘉樂忍不住哽咽起來，相當難過。

入行多年，黃嘉樂出街有人認得，但卻未必叫得出名字，試過在街頭被人揶揄，「明咩星？二打六之嘛」、「做咗十幾年都係咁？」，他說後生時會嬲，但現在卻只會覺得「依家啲小朋友咁講嘢嘅」，亦會檢討是否自己不夠努力，「被人批評，做藝人就食得鹹魚抵得渴，只要唔係人生攻擊，角色被鬧反而係好事。」

黃嘉樂自言人馬座性格樂觀，但缺點卻是鬥心不足，「我一向係低調地努力，但諗深一層其實係同呢行對立嘅，做藝人要積極爭取曝光率，我嘅性格啱啱相反，成日企埋一邊，有人搵我訪問先做，唔夠主動。」現時機會再次出現，繼《致命復活》演衰細佬外，在《心理追兇Mind Hunter》將會飾演一名醫生，而且更是王君馨的丈夫，雖然是一名悲劇人物，但嘉樂卻認為有發揮空間，希望將來有一天像張穎康上台領獎，可以親口多謝愛錫自己的家人，「如果我有機會上台，我諗我喊得厲害過佢」，說着說着黃嘉樂再次哽咽起來。