《東張》女神黎寛怡（貓仔）今日（16/6）現身將軍澳電視城出席《大師兄Welcome Summer大激戰》記者會。對於結婚僅3個月便在社交平台發文大吐苦水，指婚後要處理大量家務，身體超出負荷，割傷手指外連病兩場，令網民擔心不已。

貓仔接受《香港01》訪問時表示：「其實私底下嘅我係一個幾懶嘅人嚟，我可以形容自己係神枱級嘅懶。但發覺結咗婚之後，有自己嘅屋企，好多嘢都要自己做，有時成日都喺度做家務，同埋好多家務上嘅細節佢又唔係好上心，變咗我成日都要提佢，搞到我係好囉嗦，變得好長氣。」

至於身形顯得越來越瘦，貓仔直言由籌備婚禮至搬新居，過程相當費神：「可能呢個過程用咗好耐嘅時間，加上又要返工，一直都好忙，唔知係咪咁Chur爆咗自己，就係咁病咗，嗰段時間我真係瘦咗，我諗都跌咗5kg，相反腰圍就粗咗。」