歌手葉巧琳早前在IG上載多張父女黑白合照悼念爸爸。葉巧琳寫道：「多謝大家嘅關心，爸這一生都是付出，87年來從來都是為了家人。心真的很痛，但他終於遠離痛苦，完成一個旅途。爸，想念你！愛你，always！之後再打波ok？#我的心應該不能夠再受打擊了 #要不然」。

葉巧琳今日（29/9）現身香港東九文化中心出席有份參演原創粵語音樂劇《一束光——高錕的記憶》記者會。葉巧琳接受《香港01》訪問時一度哽咽表示：「其實心情仍未平伏，因為都係剛剛發生嘅事，同埋呢兩年我係經歷咗太多嘢，相信佢會睇到我嘅演出。」

葉巧琳否認因父親病重，而突然選擇結婚：「係因為屋企人都年紀大，我都想有個交代，希望可以話到俾佢哋聽，我有人照顧我，叫佢哋放心，咁所以我哋結婚係幾年前嘅事，只係今年先同大家公佈我結咗婚。」

被問到有否夢見過爸爸？葉巧琳表示：「其實係有，係喺喪禮前一晚，我係夢見到佢，係一個好溫暖嘅環境嚟，變咗嗰日出殯個心情都好平靜少少。（有冇講啲乜？）我唔係太記得嗰啲說話，總之我就有同佢講我會好好咁照顧屋企人，亦都會活得快樂。」