施匡翹（Zaina）近日憑微電影《路頭遠》（Longed for Home）於「法國康城獨立國際短片影展」（Cannes Indie International Film Festival）榮獲「最佳短片女主角」。今日（16/10）她出席任達華畫展開幕禮時接受《香港01》訪問，直言對獲得殊榮感到十分開心。

她表示，早前在國外生活了一段時間，直到最近才重回工作，錄製了新歌。「之前做運動少少整親，之後開始搵唔同嘅生活方式。近排終於都錄返歌，上一首係同JC合唱《矛盾系女生》，之後就去咗英國，整親又唞咗一排，而家終於可以出嚟，好開心。」

對於獲得「最佳短片女主角」，她直言感到開心：「呢個微電影其實係上年年尾拍攝，知道呢個拍攝團隊好積極，將段片放上外國平台，send畀唔同影展。原來佢哋好緊張，佢哋籌備緊，有成績先同我講。我拎到呢個獎之後，嗰時都想喊，大家都好開心，好感動。最開心嘅係，大家都為咗呢個角色，呢套戲付出咗好多。其實呢套戲同導演親身經歷好有關係。」