現年39歲的劉倩婷為2009年香港小姐冠軍，隨後簽約無綫成為TVB藝人，2013年劉倩婷與香港著名堪輿學家李丞責結婚，一年後以照顧家庭為由離開TVB及淡出演藝圈。不過，近年劉倩婷一直專注於慧妍雅集的慈善工作，早前更在社交平台宣佈獲港大邀請教授課程，引起網上關注。

今晚（21/10）劉倩婷現身灣仔出席籌款晚宴，接受《香港01》訪問時表示：「其實教課都幾有挑戰性，試過教學最長個半鐘，過程係好享受，因為每一堂之後，學生係會俾返啲意見我，多謝佢哋咁專心聽我講書。」

被問到教書會否冷落老公？劉倩婷表示：「反而係佢冷落我多啲，哈哈。因為佢成日都會上內地工作，加上嚟近佢又出書，又拍抖音，佢係仲忙過我。但之後我都諗住自己要做返嘢，諗住係做長工，遲啲到時有消息再同大家公布。」